Atguodojūt sovus školys laikus, raidejuma “Pi myusim Latgolā” veiduotuoji, rauga atguoduot viesturis stundis i voi tymuos vyspuor tyka runuots par Latgolys kongresu, kuram pavysam dreiž svieteisim symtgadi. Itam faktam agruok natyka dagrīzta eipaša viereiba. Niu, ar cereibu, ka kas pasamejs, raidejuma veiduotuoji rauga atrast Latgolys viesturis pādus školānu vuiceibu gruomotuos.

“Nu juos ir tik, cik ir,” par viesturis vuiceibu stuņdem stuosta Preiļu nūvoda Viesturis školuotuoju metodiskuos apvīneibys vadeituoja i Preiļu 1. pamatškolys direktore Nora Šnepste. “Latvejis viesturis vuiceibu gruomota itūšaļt ir daļa nu Latvejis i pasauļa viesturis kompleksuo prīškmata. Itūšaļt ir div stuņdis nedeļā – vīna stuņde Latvejis viesturei, vīna – pasauļa viesturei. Tai Latgolys viesturis vīta programā ir tod, kod par Latgolu runojam Latvejis viesturis kontekstā.”

Nora Šnepste stuosta, ka Latgolys viesturiskī fakti moz teik pīmynāti vuiceibu gruomotuos, i ite darātu poša školuotuoja iniciativa par Latgolys viesturi stuosteit vaira.

Taipoš jei stuosta, ka viņ školuotuojs spiejeigs raiseit školānūs interesi izzynuot Latgolys viesturis nūtikšonys Latvejis viesturis kontekstā. Jei nūruoda, ka školuotuojam dūta lela breiveiba i reizē ari lela atbiļdeiba, sastuodeit vuiceibu programu tai, kab tymā atrostu vītu ari Latgolys vaicuojumim i izcilim cylvākim ci Latgolys kongresu.

Sovpus godūs jaunais viesturis školuotuojs, grupys “Dabasu Durovys” solists i kinys “Gambits 1917” idejis autors Arņs Slobožanins sovā viertejumā ir cīši kritisks: “Vysa informaceja i materials par Latgolu ir napīdūdami moz pieteits, napīdūdami napareizi pasnāgts. Situaceja ir juomaina. Latvejis vaļsts vuiceibu gruomotys par Latgolys viesturi ir cīši švakā stuovūklī.”

Arņs Slobožanins pastreipoj, ka nu Latvejis izgleiteibys sistemys radeitajom viesturis vuiceibu gruomotam par Latgolu izzynoj na tū glaimojūšuokū informaceju. Puorsvorā, ka Latgola ir atpalics reģions, ka tys ir nūvods, kū steidzami vajag gluobt, rysynuot atpaliceibys vaicuojumus i īvest ite kuturu. Piec Arņa dūmom, itaidā veidā pasnāgta informaceja Latgolys školānūs roda kauna sajiutu i naveicynoj lokalpatriotismu.