Varakļuonūs apsaverama diasporys latvīšu muokslys izstuode

LaKuGa 13. Majs, 2017. gods Comments Off on Varakļuonūs apsaverama diasporys latvīšu muokslys izstuode

Da 5. juļa  Varakļuonu nūvoda muzejā apsaverama  latvīšu diasporys muokslys izstuode, kū nu sovys kolekcejis ceļojūšuos izstuodis veidā iz Ludzys Nūvodpietnīceibys muzeju atveds Cēsīs izveiduotais “Pasaules latviešu mākslas centrs” (PLMC), tai veicynojūt uorzemēs radeitys augstvierteigys latvīšu muokslys īsakļaušonu Latvejis kulturtelpā.

Izstuodē apsaverami 10 muokslinīku dorbi, kas radeiti ASV, Australejā, Zvīdrejā i Vuocejā, iz kurīni Ūtruo pasauļa kara rezultatā nūbraukuši latvīšu muokslinīki.

Latgolu izstuodē puorstuov div muokslinīku dorbi. Pyrmskara Rēzeknis muokslinīku kūpys dalinīka Juoņa Gaiļa, kas lelu myuža daļu pavadeja emigracejā ASV, i Čikagys latvīšu muokslinīku kūpā saucieja i īdvasmuotuoja Juoņa Stroda, kam tei ir atsagrīsšona tāva dzimtinē Varakļuonūs.

Izstuodē radzams vīns no pyrmajim prof. Augusta Anussa emigracejā Vuocejā radeitajim dorbim, kai ari Laimūņa Mieriņa (Angleja), Juoņa Kalmītes, Girta Puriņa, Voldemara Avena, Annys Hagen-Annusys, (ASV), Juoņa Annusa  (Vuoceja), Niklāva Strunkis (Zvīdreja)  Māra Raudziņa, Juoņa Šēnberga (Australeja) i cytu muokslinīku dorbi.

Kai nūruoda PLMC izstuožu kuratore Dr.art. Lelde Kalmīte: “Izstuode paruoda tik daļu nu daudzškautnainuos diasporys latvīšu muokslys, kas viertiejama pasauļa muokslys nūtikšonu kontekstā.”

PLMC ceļojūšuos izstuodis ar Kulturys ministrejis atbolstu pādejūs div godu laikā sareikuotys ari Daugovpilī, Kruoslovā, Rēzeknē i Ludzā.

“Pasaules latviešu mākslas centrs” izveiduots i dorbojās Cēsīs ar mierki veicynuot muokslys vierteibu saglobuošonu, kū radejuši Ūtruo pasauļa kara rezultatā Latveju pamatušī latvīšu muokslinīki i uorzemēs dzeivojūšuo jaunuo muokslinīku paaudze.

Komentari slāgti.