Daugovpilī byus apsaverama fotoizstuode “Daugavpils cietoksnis”

LaKuGa 31. Majs, 2017. gods Comments Off on Daugovpilī byus apsaverama fotoizstuode “Daugavpils cietoksnis”
Daugovpilī byus apsaverama fotoizstuode “Daugavpils cietoksnis”

1. junī 12 stuņdēs Latgolys Centraluos bibliotekys (LCB) daiļliteraturys sektorā tiks atkluota tautys fotostudejis “Ezerzeme – F” fotoizstuode “Daugavpils cietoksnis”, informej bibliotekys puorstuove Tatjana Hodokova. Izstuode ir fotostudejis dalinīku veļtejums piļsātai tuos dzimšonys dīnys svineibuos.

Fotostudeja “Ezerzeme – F” nu jau vaira kai 30 godu garumā apvīnoj cylvākus, kas nav vīnaļdzeigi pret fotografeju: i profesionalus fotogrāfus, i amatīrus. Fotostudejis dalinīki aktivi pīsadola kolektivajuos izstuodēs, reikoj personalizstuodis, pīsadola cytu fotoklubu reikuotajūs pasuokumūs. 2016. goda beiguos fotostudejai “Ezerzeme – F” ir izguojuse pyrmuo fotogruomota “Daugavpils. Cilvēki. Daba”, kurymā apkūpuots tuos bīdru rodūšais veikums pādejūs pīcu godu laikā.

Izstuodē Latgolys Centralajā bibliotekā byus apsaveramys Daugovpiļs cītūkšņa kartenis – i kruosainys, i malnboltys. Karteņu autori ir Linards Onzuls, Olga Perevalova, Jurs Buklovskis, Ivars Skudra, Valērijs Cigankovs, Sergejs Sokolovs, Svetlana Pokule, Viktors Savčenko, Jūlija Kožemjakina i Genādijs Lins.

Izstuodis atkluošonys pasuokumā tiks nūsaukts fotostudejis “Ezerzemes – F” izsludynuotuo amatīru fotokonkursa “Cietoksnis objektīvā” uzvarātuojs. Konkursa mierkis beja dagrīzt viereibu nūzeimeigam Daugovpiļs kulturviesturis objektam – Daugovpiļs cītūkšņam i rūsynuot interesi par fotografeju. Izstuodis ekspozicejā tiks īkļauti lobuokī fotokonkursa dorbi.

Fotostudejis “Ezerzeme – F” izstuode byus apsaverama LCB daiļliteraturys i nūzaru literaturys sektorūs da 31. augusta.

Komentari slāgti.