Augustā kūrs keramikys cepli Juosmuižā

Portals lakuga.lv 28. Juļs, 2017. gods Comments Off on Augustā kūrs keramikys cepli Juosmuižā

Latgolys keramikys vacmeistara Andreja Paulāna darbneicā – ceplī (Preiļu nūvodā, Aizkaļnē) 11. i 12. augustā nūtiks kasgadejais keramikys cepļa kūršonys i attaiseišonys pasuokums, informej Memorialūs muzeju apvīneibys puorstuove Sandra Zobena. Cepli kūrs TLMS “Rēzeknes apriņķa pūdnīki”.

11. augustā keramiki ar sovim apdadzynuošonai sagataveitajim muola traukim pīpiļdeis cepli i ap pušdīņlaiku tū īkūrs. Cikom ceplis kurēsīs, vokora gaitā byus vareiba pasarunuot ar pūdnīkim, vērtīs cepļa kūršonys procesu i ap pušnakti – lelū līsmi.

Par keramiku dorba rezultatu varēs puorsalīcynuot 12. augustā, kod 11 stuņdēs nūtiks vēļ korstūs, kruošni glazātūs trauku izjimšona. Byus vareiba dorbus ari īsaguoduot.

Pyrma cepļa attaiseišonys nūtiks viktorina – vaicuojumi par muzeju, Latgolys keramiku, tuos veiduošonys niansem, viesturi, formom, glazurom. Par pareizom atbiļdem – bolvys. Viktorinu vadeis atraktivais pūdnīks i TLMS “Rēzeknes apriņķa pūdnīki” vadeituojs Andris Ušpelis.

Īīšonys moksa cepļa attaiseišonys pasuokumā i muzejā – pīaugušajim 2 eiro, školānim, studentim, pensionarim 1 eiro.

Komentari slāgti.