Seiļukolnā nūtiks daudzbārnu saimem veļteits labdareibys pasuokums

LaKuGa 22. Novembris, 2017. gods Comments Off on Seiļukolnā nūtiks daudzbārnu saimem veļteits labdareibys pasuokums

1. decembrī Seiļukolna kulturys nomā paradzāts labdareibys pasuokums “Ja tu esi blakus man”, kas byus veļteits Rībeņu daudzbārnu saimem, kab pīpiļdeitu bārnu Zīmyssvātku sapynus. Pasuokumā apsavīnuos Latgolā i vysā Latvejā zynomi muziki i Seiļukolna pošdarbeibys kolektivi, prīcynojūt apmaklātuojus i ar eipašu koncertprogramu, i balu vysys nakts garumā.

Pasuokumam paradzātys divejis dalis. Vysupyrma 19.00 suoksīs koncertprograma, kurā pīsadaleis Gints Ločmelis (grupa “Ginc un Es”), Gita Dukaļska (grupa “Starpbrīdis”), kai ari Seiļukolna pošdarbeibys kolektivi. Īīšonys moksa aba zīduojums – 2 eiro.

22.00 suoksīs bals, kurā spielēs Ainārs Lipskis, “Ginc un Es”, Ēriks Gruzniņš, “Starpbrīdis”, Santa Kasparsone i “Zaļā gaisma”. Īīšonys moksa aba zīduojums – 5 eiro.

Pasuokuma laikā pyrmatskaņuojumu pīdzeivuos taišni itai nūtikšonai raksteita dzīsme “Ja tu esi blakus man” (Ginta Ločmeļa muzyka, Inetys Atpilis-Juganis teksts, studejis atbolsts: Kaspars Maks, Andris Šīrants, Girts Ločmelis, Olegs Kurakins).

Karteņa: momenti.lv (Daiga Ellaby)

Komentari slāgti.