21. aprelī nūtiks skotuvis runys konkurss “Vuolyudzāni” i atkluotuo latgalīšu rokstu volūdys i kulturviesturis olimpiade. Itūgod obeji pasuokumi nūtiks jau 18. reizi.

Skotuvis runys konkursa „Vuolyudzāni” mierkis ir styprynuot bārnūs i jaunīšūs nacionalū identitati, veidojūt izpratni par latgalīšu autoru vuorda muokslu, latgaliski raksteita teksta vierteibu, izteiksmeibu, atteisteit školānu skotuvis runys meistareibu, emocionalitati, ceļt runys kulturu i izkūpt latgalīšu rokstu volūdu. Skotuvis runys konkursā aicynuoti pīsadaleit pyrmsškolys vacuma bārni, 1.–12. klašu školāni i ari studenti. Kotram dalinīkam juosagatavej divu daildorbu fragmentus latgaliski. Itūgod īteicamuos temys ir dzymtuo volūda, muns nūvods, Tāvu zeme (vīnam dorbam juobyut nu Ontona Slišāna, Madsolys Juoņa voi Neikšānīša dailradis).

18. atkluotuos latgalīšu rokstu volūdys i kulturviesturis olimpiadis mierkis ir školu jaunuotnis vydā popularizēt latgalīšu kulturys montuojumu, nūstyprynuot izpratni par latgalīšu rokstu volūdu kai svareigu latvyskuos identitatis daļu, rūsynuot jaunīšu interesi par latgalīšu volūdu, kulturviesturi, viesturi i veicynuot kulturys vierteibu i izcyluokūs nūvadnīku apzynuošonu školuos. Olimpiadē var pīsadaleit vyspuorizgleitojūšūs školu 10.–12. klašu komandys 3–5 školānu sastuovā.

Itūgod olimpadis aizdavumu temys ir:
Latgalīšu rokstu volūda (rokstu volūdys prasmis);
Stefānija Uļanovska „Poļu Inflantijas latvieši” (1891, 2011, 2017);
Latgola i latgalīši TV raidejumūs 2017.godā;
Ontuonam Slišānam – 70;
Latgolys kulturtests (latgaliskī pasuokumi, nūtykumi, jubilejis 2017. godā).

 
18. atkluotuos latgalīšu rokstu volūdys i kulturviesturis olimpiadis nūlykums

18. skotuvis runys konkursa „Vuolyudzāni” nūlykums