Tatjanys dīnyas atbolsi Latgolā

Tatjanys dīnyas atbolsi Latgolā

Roksta autors: Inga Čekša-Ratniece, žurnals “A12”

Nu 2000. gods Latvejā teik svieteita Tatjanys dīna, kab sakmātu krīvu kulturys saglobuošonu i tradiceju nūdūšonu nuokušajom paaudzem. Pasuokumi nūteik i mozuokumtauteibu vyspuorizgleitojūšajuos školuos, i augstuokajuos izgleiteibys īstuodēs. Tatjanys dīnu, kas teik pīzeita ari par Studentu dīnu Krīvejā, piec pareizticeigūs kalendara atzeimej 25. janvārī.

Piec Latvejā daīmamuo vuorda dīnu kalendara Tatjanys teik sumynuotys 10. janvarī. Kai līcynoj Pylsūneibys i migracejis lītu puorvaļdis Īdzeivuotuoju registra statistikys dati, Tatjana ir vīns nu popularuokūs personvuordu. Latvejā ir 20434 Tatjanys, Reigā dzeivoj gondreiž 10 tyukstūšys ituo vuorda eipašneicu. Lels skaits Tatjanu ir Daugovpilī, registrātys 1876. Personvuordu skaidruotuoji pīzeist, ka Tatjanys vuorda eipašneicys ir optimistis, jom napateik nasaskanis i streidi, ar sovom problemom golā teik pošys, koč ari klusys, tok juos ir sabīdreibys dvēsele.

Tatjanys dīnai veļteiti pasuokumi, kurūs teik īsaisteitys školys, Latvejā parosti suocās 10. janvarī i ilgst da mynātuo mieneša 25. datuma. Krīvvolūdeiguos školys puorsvorā nu Daugovpiļs i Preiļu pīsadola Reigys regiona reikuotajā muokslys izpiļdeituoju konkursā “Tatjanas diena”, tai atkluojūt sovus muzykalūs, muokslinīcyskūs, literarūs i pietnīcyskūs talantus. Augstškoluos itei dīna teik svieteita 25. janvarī, kod nūsaslādz zīmys seseja. Svātuo Tatjana taišni Krīvejā bejuse studentu aizbiļdne, par jū palykdama 1755. godā, kod tyka paraksteits reikuojums par Moskovys universitatis dibynuošonu. Niule pasaulī itū dīnu svietej miļjonim studentu. Juosoka, ka Svātuos Tatjanys dīnu atzeimēja ari pyrmskara Latvejā. Tradiceja, kura sagloboj i popularizej kaidu nu kulturu i tradiceju, sabīdreibu atkluoj juos daudzveideibā, ka viņ jai nateik pīškierta politiska nūkruosa.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.