Roksta autors: Ināra Volkova, žurnals “A12”

Ievys Salietis, Ilonys Rupainis, Sandrys Staris, Eināra Lipska dzīduošonys gruomota saimei “Zalta Puče” ir vīna nu pīcu nominantu Muzykys īrokstu goda bolvai “Zelta mikrofons 2019”. Gruomota i diskys ir izdzīžama, izklausoma i vīnkuorši – izaverama. Storp pučis lopom tu pamaneisi vysaidys seikbyutis – zvaigzneitis, peleitis, ūzula zeilis… Tuos ir notys! Viņ “puorsavylkušys“! Jom palyka garlaiceigi, malnom i opolom, sēdēt notu linejuos, i nu juos grib īpazeit tevi.

Latgolys nūvodā ir lela izlūkšņu, vītvuordu, folklorys i horeografiskūs materialu i tautys tradiceju boguoteiba. Kab tū vysu saglobuotu, Rēzeknis radūšajim darbinīkim i kolektivu daleibnīkim saīmūt kūpā dzīduot i muzicēt ar sovim tūlaik vēļ mozajim bārnim, 2003. gods pavasarī izaveiduoja folklorys draugu kūpa “Vīteri“. Jūs organizātuoja i ari niulenejuo vadeituoja ir Sandra Stare. Piec puora godu folklorys kūpys darbeibā īsasaisteja ari muzyks Einārs Lipskis. Juo vadeibā tyka izveiduota folklorys kūpys “Vīteri“ kapela. Folklorys kūpa ir izškoluojuse jau nazcik atraktivu, entuziasma pylnu i talanteigu jaunīšu paaudzis, kas vys vēļ cīš daudz nu sova breivuo laika veļtej muziciešonai. Kapelys muzyki spēlej kūkli, cimboli, mandolinu, vejūli, kontrabasu, akordeonu, ermonikys, stabuli, flautu, blokflautu, bubynu, tamburinu. Kab ar latgalīšu tautysdzīšmu daņčim i melodejom īpazeistynuotu vysjaunuokū paaudzi – pyrmškolys vacuma bārnus – i ari jūs dzymdynuotuojus, roduos itei latgalīšu dzīšmu i daņču gruomota. Jamā na viņ notuos, bet ari zeimiejumūs var izdzīduot zynomys i mozuok zynomys Latgolys melodejis. Sevkurys dzīsmis ci daņča zeimiejums ilustrej melodejis vierzeibu – augstuokys ci zamuokys notys, lānuokys ci dreizuokys ritmiskuos vīneibys.

Muzykys īrokstu goda bolvys ceremoneja nūtiks Dailis teatrī 12. februarī. Jū kluotīnē apmeklēs vysi nominanti, atbaļsteituoji, žurejis puorstuovi, bet sevkurs interesents Latvejā i cytur jū varēs vāruot tīšraidē Kanalā 2.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.