Rokstu sagataveja: portals lakuga.lv

Portals lakuga.lv pīduovoj jaunuos latgalīšu dzejneicys Rasmys Sviklis dzeju.

***

dīna kod tymst aiz lūga
kreit klusums iz skrūpstu
kreit pādejī saulis stori sirdī
tik vīgli

aizlidoj taurynu bori
izplaukst puče
zaļoj bārzam zori
atlidoj putyni
iz pavasari

dīna kod satymst aiz lūga
nūgluosta klusums pasauli
mīlesteibys rūkom

Sudobra gradzyns

sudobra gradzyns
pierstā speid

saulis spūžumā
izaver drūss
kotrys rūkys viezīņs
kotrs pīskuorīņs
sūļs

sudobra gradzyns
pierstā speid –

mīlesteiba
i lobs vuords

Kukuļs

pīteik
nu bārza pumpura
zaļumu jimt
vajag pošai
kai pumpuram plaukt
i lopys dzeit

tikai pa druskai
pa druponai viņ
dzeivis laimi
salaseit var

nu bārza pumpura
nu saulis stora
nu maizis rīcīņa
nu stypra gora

pa druskai
pa druponai viņ
laimis kukuļs
augs

***

rūtenis būrtneicā
puoruok pareizys
škīt

sveitrys iz sīnys
lyudzu
nūplēsit

iztryuka vuordi
nūstuoja snigt
sabyra dabasūs zvaigznis

laiks migt

Sātā

cauri reita rosai
kuojom bosom
es sātā eimu

cauri rudiņa lopom
myglom soltom
es sātā eimu

cauri boltim snīgim
sarmuotim reitim
es sātā eimu

cauri īvzīdu ryugtumam
pīniņu soldonumam
es sātā eimu

cauri dzeivis godalaikam
es sātā eimu

Vacuo sāta

aiztak rosa
osorys aiztak
sabryuk sāta
teiruma vydā
tī jau nikuo
viņ škūrstyns dabasūs
kai rāgs
pret mienesi smejās
aiztak rosa
osorys aiztak
čārc vuorna
škūrstyna golā

***

troki eņgeli
dabasūs skrīn
grib salaseit zvaignis
pa vīnai viņ

nūnest iz zemi
lai ļauds dabasūs verās
i tuos pagaisušuos zvaigznis
atpakaļ sauc

Liduojums

aizmyga dīna
iz akmiņa placu
zalis syunys
par pologu lyka
ar īvys zīdu
apsasedze
skaista i sylta

pasauļs palyka kluss
īvu smuordā
nakts i dvēsele gryma

pazuda
akmiņa smogums
pazuda nūgurums
palyka viņ
īvu smuords
i liduojums

Mygla

mygla
puor acim
nūkreit
es jau nikuo
es tik soku
aiz tuos myglys
Daugava apklust
i acs naruoda vairs
kur suokums
kur gols

mygla
puor acim nūkreit
jei jau nikuo
jei tik soka
putyni vairs nadzīd
i sirds nasaprūt
kurā krostā
atskaņ tovs bolss

Treisriņdis

pylni jumti
bolūžu staigoj
dvieseļu bārni

zīdūši dabasi
zylys pučis
pi kuoju kreit

nūsoluši piersti
nav kulaiņus apvylkuse
mīlesteiba

sorkona rūze rūkuos
piersti
ieršķūs dzeļ

dabasūs muokūni
vuškenis skaita
pļovā zīd peipinis

treis vuordūs vyss pasaceits
tik naeists
ka nav pasaceits nikas

Roksts sagataveits ar Vaļsts reģionaluos atteisteibys agenturys finansialu atbolstu nu Latvejis vaļsts budžeta leidzekļu.