Prīškaceklis voi reklamkadri?

Prīškaceklis voi reklamkadri?

Roksta autors: Sandra Ūdre

21. martā publicātuo ziņa par Vīstura Kairiša jaunuos filmys “Piļsāta pi upis” reklamkadrim dažūs skaiteituojūs radeja nasaprasšonu – kas tys par vuordu “prīškaceklis”. Tuoļuokais izkluosts ir muna redaktoris atbiļde par tū vaicuojušajim.

Napaseņ dzymušajam vuordam “prīškaceklis” kai sevkuram jaunvuordam varami div scenareji: ka sabīdreiba pījims, volūdā īīs iz palikšonu par vyspuorlītojamu vuordu; ka – napījims, pasagrūzeis kaidu šaļteņu individualā lītuojumā īrubežuotā telpā – varbyut viņ Facebook vidē. Par vuordim kai bitem – iz reizis nikuo navar zynuot. Pīmāram, taidi dižuo volūdnīka J. Endzelīna jaunvuordi kai aptumsums, atbilst, attieksme, dotumi, ietekme, izcils, labestība, necils, senisks latvīšu volūdā īsavīse, bet par juo kādeni, noriseni, mazguli gribīs smītīs. A. Kronvalda 1868. godā īsaceitū jaunvuordu dziede poezejis apzeimuošonai napījēme, tod jis sadūmova dzeja – tys aizguoja.

Attīksme pret jaunvuordim da ituo portalam lakuga.lv bejuse gona konservativa. Izgiunūt ar mekliešonys reiku interesiejušūs vuordus i izveidojūt statistiku, var pīzeit:

1) ratūs gadejumūs jaunvuords lītuots vairuok par neitralu vuordu/literarismu (škārsteiklys – 291 lietojums, internets – 98; dalinīks – 1269; daleibnīks – 120); 2) vairumā gadejumu dominej dajiukta vuorda izalaseišona (pasuocīņs – 501, pasuokums – 2023; kuļdinīks – 8, (mobilais/gudrais) telefons/telepons – 166; sovinīks – 5, eipašnīks 136);

3) ka sinonimu ailē treis i vairuok vuordu, tod ari ir vīna puorsvors (brends – 7, zeimyns – 13, zeimūls – 110; atīsme – 4; atītme – 2; byusme – 1; byutīne – 6; nuokūtne – 434).

Saprūtams, ka vuorda “prīškaceklis” lītuojums, ka itūreiz pajimts nu Facebook vidis, izraisa varbyut pat napatyku, bet tys rūsynoj veiduot sovu redzīni dziļuok par pateik/napateik, sprīst i diskutēt na viņ par itū konkretū vuordu, tok plašuok par vuordu izalaseišonu sovūs i cytu latgaliski saraksteitajūs tekstūs. Mes asam puoruok īcīteigi pret diletantiski saraksteitim i nakritiski publicātim tekstim (te nadūmoju naviereibys klaidys, nu kuru naasam pasorguoti), publiski tiražātom pasuokumu afišom i muzykys īrokstu disku vuocenim, kuru autori pat naaizadūmoj par sovu produktu latgalīšu volūdys kvalitati. Tys tod līk aizadūmuot ari par kvalitati cytuos jūmuos.

Paļdis Vīsturam Kairišam par vuordu i lūbšonūs juo jaunajai filmai! Bet cytu reizi lakuga.lv tekstā raksteisim “reklamkadri”.

Nūtikšonu kalendars