Lūznovys muižā literarys sarunys i teatrala dzejis impreseja

Lūznovys muižā literarys sarunys i teatrala dzejis impreseja

Rokstu sagataveja: portals lakuga.lv

Svātdiņ, 7. aprelī, 13.00 stuņdēs cykla “Literārās sarunas Lūznavas muižā” turpynuojumā tikšonuos ar Ivetu Ratinīku i juos dzejis impresija “Sataustīt laiku” Rēzeknis Tehnologeju akademejis (RTA) studentu teatra “ĶerRA” izpiļdejumā, informej Lūznovys muižys kulturys projektu vadeituoja Inga Žirgule.

Iveta ir dzejis gruomotu “Rūgts” (2011) i “tikko & tikai” (2018) autore, Āgenskolna Vaļsts gimnazejis latvīšu volūdys i literaturys školuotuoja, literaturys pietneica i liberala politike ar polemiskim redzīnim. Sovulaik kai Ivetys pasnīdzieja Rēzeknis Augstškolā, profesore, literaturzynuotneica, itūšaļt Latvejis Republikys izgleiteibys i zynuotnis ministre Ilga Šuplinska pīzeist: “Vys atguodoju Ivetys spūdrū pruotu, daudzūs talantus, spieceigū harizmu i muoku atkluoti izsaceit sovu poziceju, redzīni. Eksistenciali ironiskuo, postmoderni abstraktuo (ari absurduo) stila analizātuoja, pīļaunu, ari vuiceituoja školānim, bet puorsteidzūši liriska i sīviškeiga dzejradeituoja.”

Par dzejis impreseju “Sataustīt laiku” RTA studentu teatra “ĶerRA” režisore Olga Senkāne soka: “Myusu teatra aizaraušona ar dzejis kompozicejom suocēs 2010. godā dzejis uzvadumā “Mēness un Metafora”, kas kasgadejā Latvejis studentu teatru festivalā dabuoja žurejis specbolvu par novatorismu i originalitati (2011). Ar Ivetys debejis dzejūļu kruojuma “Rūgts” (2011) semiotisku apspēli, pīsadolūt pošai dzejneicai, 2012. godā “ĶerRA” pyrmū reizi dabuoja Latvejis studentu teatru skatis golvonū bolvu – Sudobra uoksta capuri.

Karteite: Agrita Grosberga

Itūšaļt, piec vairuoku godu puortraukuma, nūteik teatra otkonatsagrīzšona pi Ivetys poetiskuo pasauļa redziejuma īmīsuošonys muzykalā kusteibu spēlē “Sataustīt laiku”. Izruode veiduota kai īskaņa dzeivam dzejis lasejumam. Byutiska lūma ite atvālāta atkuortuojuma ritmam, aktera mimikai, žestam, kusteibai, kū papyldynoj rekviziti-simboli. Ar dzejūļu kruojuma “tikko&tikai” metaforu vizualu i skanisku interpretaceju tiks atkluotys dzejis “Es” attīceibys ar laiku/puorejūšū/naatgrīzeniskū i myužeigū/napuorejūšū/cykliskū. Skateituojam vīnkuorši juosaļaun redzis i dzierdis gleznu radeitai nūskaņai i asociaceju spēlei, kas jūs īvadeis dzejis tālu i tālaineibys pasaulī.”

Īejis moksa 3,00 eiro. Beleti saryupejami “Biļešu Paradīze” beletu tierdznīceibys teiklā i iz vītys Lūznovys muižā. Literarūs sarunu cykla nūtikšonys Lūznovys muižā atbolsta Vaļsts kulturkapitala fonds i Rēzeknis nūvoda dūme.

Nūtikšonu kalendars