Izsludynuots latgalīšu dzīšmu remiksu konkurss

Izsludynuots latgalīšu dzīšmu remiksu konkurss

Rokstu sagataveja: portals lakuga.lv

Latgalīšu dzīšmu remiksu konkursā bez kaidu īrūbežuojumu var pīsadaleit sevkurs muzykys DJ ci producents. Konkursa mierkis ir popularizēt i aktualizēt dzīsmis ar latgaliskim tekstim. Remiksa dorbu padūšonys termeņš ir 13. majs, bet bolvu fonds – 1000 eiro, informej bīdreiba “Latgolys Producentu Grupa”.

Kai remiksa originala materialu var izmontuot sevkura autora/muokslinīka/grupys sevkurā stilā radeitu dzīsmi, kas originalā teik izpiļdeita latgaliski. Konkursa organizatori ar prīcu paleidzēs DJ sasazynuot ar konkretu dzīšmu autorim par īspiejom dabuot interesejūšūs originalūs dzīšmu skanis celeņus.

Konkursa bolvu fonds ir 1000 eiro (naudys bolvys tiks izmoksuotys autoratleidzeibu formā): 1. vītai – 300 eiro (350 eiro – kūpā ar vysim autoratleidzeibu nūdūklim), 2. vīta – 240 eiro (280 eiro), 3. vīta – 180 eiro (210 eiro), specbolvu fonds – 160 eiro. Ituo fonda atbolsts tiks nūsaceits i sadaleits atkareibā nu padūtūs remiksu daudzuma, kvalitatis i originalitatis. 

Organizatori patur īspieju vysus konkursam padūtūs dorbus izvītuot škārsteikla socialajūs portalūs i atskaņuot jūs publiski. Konkursa remiksa dorbu padūšonys termeņš: 13. majs 23.59 stuņdis. Remiksa fails juoīsyuta iz epostu: latgolys.producentu.grupa@gmail.com Rezultati tiks paziņuoti 24. majā Konkursa žurejā byus “Latgolys Producentu Grupa” puorstuovi i pīsaisteitī nūzaris profesionali.