Kaidys gribi, taidys beigys. Biļets – 2,50ls

Nu suokuma par tū bloga atvaļinuojumu…. beidzēs, bet pi reinkarniešonuos tiek struoduots. Nav jau vainis dzievuot i itymā butkā ;)

Saguo tai, ka Leigū/Juoņu svātki proguo, kai puosokā. Veļ dīna, i byutu puorzavierts ļaunā elfā voi orkā ar pašķidru golvys apmatuojumu. Bierzgalis basneickungs tai ari pascē – „Puosokuos dzievuot ir labi i vīgļi”. Tai ir. Veļ šod tod pa reizei puorskaitu kaidu puosoku. Tī vysa mozuo gudreibeņa vydā. Kurā ir, a kurā i nav.

Ir taidys puosokys bez jāga. Deļ tam, ka babeņa pi šyupeļa runuodama, unukam beja prostuotiese vysu kū zynuo, bet bārnāks naguļ … nu i beiguos koč kam puosokā elegantai juonūmierst, jo babeņa naatguodoj kas beja suokumā. Taidys ir tuos latgalīšu puosokys … kai ta tai atlaissi puosoku vāļā bez nivīnys nuoveitis. Atminī palyk vīns fragments nu puosokom, kur dažys vajadzē iraksteit Latgolys Radejā – “… mozī valni atnese zalta krāslu pošam valnu valnam. Pastatē tū iz kolna viersa, i nūbāga prūm, kai žydi.”

Deļkam Leigū /Juoņu puosoka, deļ tam, ka Ceradryvys puorzavērte par episki interesantu nūslāpumim, gadim i škierzlotim apveitu vītu, kur šudiņdīnys nav i ir beigusēs laika izjiuta. Aiz nogim malnums, ka juogrīž leidz ar gali. Tys, nikas, tys nikas… Mīsa ataug. Dažim vairuok kai vāga i napareizajuos vītuos

Lai bytu „smuki un zolīdi, kā laukos”, koč kam i juopastruodoj. Acazeistu, itūgod struoduots tyka mozuok. Nu daži struoduo ari deļ tam, ka jīm nav taidys galerejis kaidā portālā (ļaunjenotmīkly9). Guņskuram vinkuorši bolkys taidā izmārā sagrīztys. Kuo tī ar seikom māžuotīs. Irir- navnav! Bet, lai voi kai ….. Kai jau minieju tei ir apburta vīta, vyss ar Jura&Co svietiebu tyka izdareits – sateireits, sagrīzts, sanasts i.t.t. Golvonuo rozīne, beja guņskurs (5m(apmāram) augstumā) plus babys aizsuoktuos i vysu cytu papyldynuotuos Leigū dzīsmis.I dzīsmis, kai taidys. Nu babys atmiņu kruojumim i nu puorejūs, kas zynuo burtus.

Puosokuos ir i breinumi, i laimeitis, i suopeitis. Vīna nu suopeitem, ka nu smīšonuos daž aizasuopē vādara preseite :D  Breinumi taidi, ka nu molys pīzadalieju drauga sasvuotuošonā „in live”. Reāli. Hop-hop, vyss pa mozom, atbrauc mama, baba + veļ attīceigī saimis lūcekļi i – Ruodi ļaudaveņu! Nu molys vāruot beja cīš glaunai, feinai i ola dadzieru ar eipašu baudu….ruodīs, kai kuosa eleksīrzuolis bierneibā. Ā, nui, myusem beja sovs, sātys ols, kurš itūgod naizabeidze. Laikam deļ tam, ka uztaisēm Warning zeimi „Spanī nameizt!” ar vysom ilustracejom.

A, suopeitis kortam sovaižuokys. Kū tī runuot. Veļ īzavuicieju meditaceju da gola pylnveiduot, kurymā navāg nikaida  – Oummmm- taisiet. Kurš gryb itū sarunu – nūklikšynoj tod ite pat iz Īluopeņi.


Es turu nūceji, ka jiusem beja koč kai feinai, i ka tik pošim patyka. Naleigojom jau deļ sābru Zabaļis voi deļ kuo cyta.

Deļ kam rakstēt par vīnu lītu, ka blogā var sarakstēt/pastuostēt vairuokys.

Veļ pabeju Pīterūs. Taišņuok – Pīterdīnā Rogovkā 2010. Pasuokums uorā pi školys pļovā. Vysmoz itū god lykuos taids feins. Napīspīsts, i tyvuok tautai. Pofig, ka ļaužu moz. Leluokuo dale jau iz itū pasuokumu brauce deļ šmakovkys i syltūs kotletu afterpārtijā. Nu vyss proguo labi, i nūdūmuoju, sovkuort, taidu dzelu – Iz kuo ir gotovs deputāts? Grybātu vot redzēt, kai deputāti pyrma vieleišonu staigoj iz rūkom pa guņskura ūglem, kustnuodami kuojis i sauc „Bolsoj par mani! Bolsoj!” :D

Beja ari Reigys delegaceja, kas beja deļ tuo, ka jai juobyun. Nu, i prūtams ka jau vyss pasuokums guo razgarā, jī attīceigi (kai i čiuļus lomoj) pīzacēl kuojuos…atvodu runys…cik lobs pasuokums bla,bla,bla – braucom iz Reigu..ceļš ta tuolejs. Ai,ai,ai!

Ite foto,kas palyka aiz jīm :D

i tai jī aizguo….

Vīns ailinīks nu tuo bora ar nikū naizacēle, tik viņ tū, ka buorstē appeliejušūs stereotipus par latgalīšim i koķetē ar padsmitgadeigu meitušku dāruodams autografu jai gruomotā. Es uzbyuru vīzeju. Byutu es juo godūs, pajimtu poša rūkom nūkautuos kozys uodys cimdeņus i pļoukš par byudim  „Provoqua en duel!” :D

Naīšu taisēt copy-paste. Info ite:

http://www.rezeknesnovads.lv/rrp/lv/content/2/1/33/?p_id=3640

Es tik aizkulisis pastuostieju ;)

Maņ puosokys turpynojās. Līkūs slimineicā, lai sariktei da gola. Zynit, taids jūks – „Kū tu nagrybātu dzierdēt tymā šaļtī, kod tevi īvad operaceju zalā? Atbiļde – kaču ņaudīņus”

Saīs puora dīnu boltajā puosokā padzeivuot ar vysom izrītūšjuom sekom. Da nikuo. Laikam i labi, ka breivdīnuos sabeju vīnuos apvuiceibuos/seiminarā (naformaluo izgleiteiba i.t.t). Vajadzē refrešu, to otkon beja sazakruojs puoruok daudzi info. Restartu vāg ni tikai datorim i mašinem.

Vyspuor, verīs vīna puosoka beidzēs tai, ka bārni paspē izaugt. Vysim zynomuos „Hameleonu rūtaļis” beidzūt beigsīs. Varbyut tys byutu īmeslis nūsīt tuos lenteitis, kas maņ atguodynoj kolorado vabaļu svuorkus.

Iz palīkom –

„Zombāti bingo spālātuoji,

par nīceigu laimestu

vysu nakti grīž zūbus.

Koč poši lobpruoteigi

atsasoka nu pādejuos naudys.

Tautiskuo romantisma garša

kiuņojās napabeigšonys fāzē,

tūmār prīceņš, ka parka beņči

stuov tīpat, kur četri godi atpakaļ.

Pamozom saskoloju palīkys

Nu pādejuom vakareņom,

aplikacejuos saleimiešu puors metaforu,

pa kaidam svešvuordam.

Vysu vīnā taikumā.

Tod pasciešu – „ A tai vot i vāg!

Tei muna attīksme pret dobu” R.S

Print Friendly, PDF & Email

Kalenders

Jul
18
Cat
14:00 Bolvu nūvoda svātki @ Bolvi
Bolvu nūvoda svātki @ Bolvi
Jul 18 @ 14:00 – Jul 20 @ 23:45
Bolvu nūvoda svātki @ Bolvi
16:00 Storptautyskuos rezidencis nūslā... @ Rotko muzejs
Storptautyskuos rezidencis nūslā... @ Rotko muzejs
Jul 18 @ 16:00 – 17:30
18. julī 16.00 stuņdēs Rotko muzeja konferenču zālē nūtiks storptautyskuos rezidencis nūslāguma izstuodis atkluošona.   Nedelis garumā, nu 12. da 19. juļa Eiropys Savīneibys finansātuo projekta “Eiropas kultūra: Visi dažādi – visi vienlīdzīgi” laikā Rotko[...]