Kulturys īsacejumi nedeļai: styprynuot pīdareibu Latvejai caur muzyku, tradicejom i sovejūs atbaļsteišonu
Rokstu sagataveja: portals lakuga.lv
Vaļsts svātku zeimē itūreiz ari eistyn patriotiski īsacejumi kai lobai laika pavadeišonai, tai sovejūs atbolstam. Taipoš atguodynuojums napagaisynuot asūšuos saimis tradicejis i varbyut ari veiduot jaunys. Par ituos nedelis īsacejumim pasaryupiejuse Zemissardzis 3. Latgolys brigadis puorstuove dyžkareive Evita Kozule, kura kasdīnā apvīnoj vysā nūpītnu dorbu militarejā jūmā ar ryupem par saimi i patriotisku vierteibu nūdūšonu jaunuokajai paaudzei.
Klausīs patriotiskys dzīsmis par Latveju i Latgolu
Par pīmāru, “Bez PVN” i Valters Pūce – “Skaidys”, “Latgalīšu Reps” – “Trešuo zvaigzne”, “Raxtu Raxti” – “Zeme, Zeme, Daugaveņa” i cytys. Izveidoj pats sovu muzykys sarokstu ci izavielej kaidu nu jau gotovu. Zemissardze itymā godā svietej sovu 35. goda dīnu i tam par gūdu zemissorgi ir atlasejuši vairuokys spāka dzīsmis kasdīnai, vuiceibom i svātkim. Vaicoj Spotify ite.

Lai sevkurā vītā ir mīrs
Novembris ir laiks puordūmom par sovu zemi i tautu. Mes itūšaļt Latvejā varim dzeivuot mīrā i drūseibā, bet ukraini tikom napaguruši aizstuov sovu vaļsti i naatkareibu. Zīdoj Ukrainys armejis i tautys atbolstam. Tik asūt vīnuotim, varim mazynuot kara suopi. Itamā geopolitiskajā situacejā vysod juopatur pruotā, cik svareiga ir breiveiba i ka tei nav pošsaprūtama. Lobs apkūpuojums par zīduojumu īspiejom ir tepat portalā lakuga.lv.

Turpynoj saimis tradicejis ci nūdybynoj sovys
Maņ ir svareiga pīdareiba saimei i vītai, kurā dzeivoju. Tei ari ir muna Latveja. Tū niu raugu nūdūt sovam dālam. Jau nu mozu dīnu kūpā pīsadolom Luočplieša dīnys lāpu guojīnī. Bārns maņ vēļ ir mozeņš, bet jau tagad jam stuostu, kas ir Latveja i vīnkuoršim vuordim runoju par viesturi. Jis zyna, ka mama ar tēti ir karaveiri i kasdīnā sorgoj kai jū, tū ari vysus puorejūs. Aicynoju ari cytim nasabeit saimē runuot par it kai nūpītnom temom. Lai vysim skaisti vaļsts svātki!


Komentari