9. novembra vokorā bufete-skaiteitova „Pie Humberta” kliva par sovpateigu geografejis stuņdis nūrisis vītu ar golvonū stuņdis temu – Muzykaluo geografeja: Viļāni i Varakļāni. Tys deļ tuo, ka Latgolys Studentu centrs ar itū vokoru aizsuoka jaunu projektu „Muzykaluo geografeja”, kura ideja ir caur muzykalu Latgolys jaunīšu aktivitatem drupeit vaira izzinuot par Latgolys vītom, kai ari vaira izzinuot par grupom, apvīneibom, kolektivim, kurūs spielej muziki nu Latgolys i na viņ latgaliski. Pyrmā reizē ar muzykalu snīgumu prīcieja duets „Momend”, kurā dorbojuos Kārlis nu Varakļānim i grupa „Inlay” ar viļānītem Aritu i Zani.

Pa storpu muzykalajai prīcai vokora vadeituoja Dace Skrauča ar vaicuojumim patirdieja ari atguojušūs klauseituojus. Pīduovuojom ari Tev īspieju puorbaudeit sovys zinuošonys. Voi zini:

Par Varakļānim:

• Kas attāluots Varakļānu gierbūnī?
• Kurā godā daškiertys piļsātys tīseibys?
• Cik tuoļ nu Reigys ar mašini ir Varakļāni?
• Kurys grupys koncerts Varakļānūs nav cīši vālams?

Par Viļānim:

• Kas attāluots Viļānu gierbūnī?
• Kurā godā (godu symtā) Viļāni pyrmū reizi mināti?
• Kaida upe tak cauri Viļānim?
• Kod pyrmū reizi nūtyka Viļānu tiergs?

Kotram – i muzikim, i klauseituojim beja juoatsazeim kartē, taidā veidā kūpeigi taisūt muzykalū geografeju, kas iz prīšku klius arviņ plašuoka i plašuoka.

Muzykaluo geografeja obrozūs:

Vaicuojumus izdūd vokora “konferensjē” Dace

Duets “Momend”: Normans (sitaminstrumenti) i Kārlis (gitara i bolss)

Varakļānīts Kārlis

Grupa “Inlay” Ilze, Arita, Zane, Artūrs i aiz kadra palics Mārtiņš

Vijuoļneica Ilze

Klauseituoji

Pyrmuos reizis muzykaluo geografeja – ar sorkonim apleišim muzykalūs jaunīšu dzymtuos pusis

Ari Reigā ir latgalīšim draudzeigys vītys!

Vaira biļžu: http://picasaweb.google.com/ortografeja/MuzykaluoGeografeja#