Praktikante portalā LaKuGa.LV
Muns tāvs ir latgalīts, muote krīvīte. Bierneibā runuoju muotis volūdā. Tak saimis apstuokli mainiejuos – apmāram nu 5 godu vacuma dzeivoju pi tāva mamys. Tod arī suocēs muns ceļš iz latgaliskū, asūt attīceiguos volūdys i tradiceju vidē. Tagad es latgaliski dūmoju, runoju, rokstu i skaitu. 2007. godā pīsadaleju Naaizmērstulei veļteitajā jaunradis dorbu konkursā ar dzejūli. Studeju ītvorā asu īsapazynuse ar latgalīšu pareizraksteibys nūsacejumim. Paguojušajā godā ar kursabīdrim pīsadalejom latgalīšu volūdys i kulturviesturis olimpiadē, kur nūderieja gon raksteibys prasmis, gon papyldus īgiutuo informaceja par latgalīšu literaturu, rakstnīkim, kulturys darbinīkim i cytim vaicuojumim. Niule asu bīdreibys „Latgolys Studentu centrs” (LgSC) draugs. LgSC es vysod jiutūs gaideita. Tī var satikt foršus, pozitīvi dūmojūšus ļauds. Latgaliskā gaisūtnē var īdzert čaja, puorrunuot par pasuokumim i aktivitatem… Asu prīceiga i lapna, ka varu byut starp soviejim.
Ari portals LaKuGa.LV apvīnoj vysu, kas ir saisteits ar Latgolu i latgaliskū, taitod tū, kas maņ ir svareigs. Es varu giut nūdereigu pīredzi, gon poša rokstūt rokstus i taidejaidi koč drusku papyldynojūt portala saturu, gon ari paplašynuot sovu redzislūku, jo Latgalīšu Kulturys gazetā pa eistam var atrast daudzveideigu informaceji. I vēļ – skaitu, ka portala dizainā na veļti dominej zaļuo kruosa, tei ir atteisteibys i sadarbeibys simbols. Nu, tod sasadorbuosim – kūpā mes varam vairuok!
18. martā Rēzeknē tyka organizieta izstuode „Izglītība un karjera 2011”
Pasuokumā sevi prezenteja 17 Latvejis augstuokuos i profesionaluos izgleiteibys vuiceibu īstuodis.
Informativajūs stendūs visi interesenti varie īgiut informaceji par izgleiteibys īspiejom i pīpraseituokajom profesejom dorba tiergā.
Pasuokuma ītvorā nūtyka ari erudicejis konkurss Rēzeknis piļsātys i nūvoda vydškolānim. Konkursu reikuoja Rēzeknis Augstškola (RA) sadarbeibā ar Rēzeknis Uzjiemieju bīdreibu. Erudicejis spielī pīsadalē 9 komandys (kotrā komandā 5 cylvāki). Konkursam beja divys kuortys – pyrmajā daleibnīki atbildeja iz 20 ar ekonomiku saistietim vaicuojumim, ūtrajā daļā tyka ruodeits sātys dorbs, t. i., kaids radūšs prīkšnasums par temu „Nuokūtnis biznesa plans”. Izpiļdiejumi puorsteidze ar školānu izdūmu i atraktivitati: beja ideja īvīst uotrviļcīni iz Rēzekni, atjaunuot Rēzeknis pīna kombinatu; školāni pīruodeja, ka izdeveiga ir kanepju audziešona, pamatuoja kurjera napīcīšameibu dažaiduos dzeivis situacejuos, pīduovuoja atvērt muzykys kopejneicu; tyka izstruoduots plans par liduošonu uz mienesi i.c.
Komandu veikumu izviertieja kompetenta žūreja – RA rektors E.Teirumnieks, SAN speciāliste L.Kivleniece – Kuzņecova, RA Inženeru fakuļtatis Studejūšūs vaļdis vadeituoja S.Viša, projektiešonys firmys SIA “Austrumi” vaļdes prīšksādātuojs I.Dembovskis i Latvejis Dorba Devieju Konfederacejis socialuo dialoga koordinatore Latgolys regionā S.Baltace. Par uzvareituojim kliva Rēzeknis 5.vydsškolys komanda „Blondie” un īgive golvonū bolvu – apmoksuotu braucīni vīnys dīnys ekskursejai ar SIA „DEKOM” autobusu (500km). Boulinga spēlis kartis sajieme Nautrānu vydsškolys, Rēzeknis 1.vydškolys i Rēzeknis Vaļsts Pūļu gimnazejis komandys daleibnīki.
Vysim beja īspieja baudēt arī 2011.goda Latvejis konkursa „Eirovīzija” uzvarietuoju dueta „Musiqq” uzastuošonu.
Šaids izglīteibys pasuokums Rēzeknē nūteik jau vairuokus godus.
Informaceja vysim studētgribietuojim: laipnai gaideiti 15. aprelī Rēzeknis Augstškolys Informacejis dīnā!
Kristina Komarova