Laikroksta “Diena” sastdinis pīlykumā ir plašuoka intervija ar Latvejis Republikys 10. Saeimys deputati Janinu Kurseiti-Pakuli. Saruna puorsvorā ir par cytom temom, bet vīns vaicuojums ir bejs ari tradicionalais: “kas ir latgalīšim – volūda voi dialekts”?

– “Latvīšu volūdys paveids. Latgalīšim ir normāta rokstu volūda. Asu kategoriski pret runys volūdys normiešonu. Ka mes radeisim, kai gryb daļa jaunuos latgalīšu paaudzes, regionalu volūdu, myusim byus vysmoz divejis regionalys volūdys – ari vacticeibnīku. Tod latvīšu literaruo volūda grybūt nagrybūt paliks par trešū regionalū volūdu, i nav gryuts īsadūmuot, kas tod vaļdeis volūdys i kuļturys vidē. Ka gribam nūstateit latvīšus i latgalīšus vīns ūtram preteimā, tod nagribam, ka Latveja dzeivoj.” (Puorlykts nu latvīšu literaruos volūdys)

LaKuGa.LV komentars:

– Varam pīkrist, ka atbylstūši asūšai lykumdūšonai latgalīšu volūda kūpā ar latvīšu literarū volūdu varātu byut diveji leidzvierteigi latvīšu volūdys paveidi. Cik myusim zynoms, ari latvīšu literaruos volūdys runa nav da golam normāta, deļ tam ari latgalīšu volūdys boguoteibu nūsorguošonai varātu runuošonys vaicuojumūs trokai nazajaukt. Kai jau LaKuGa.LV rakstejuse īprīšk – ir cyts svareigs vaicuojums, voi Latvejis lykumdūšonā tiks nūprecizāta termina “latvīšu volūdys paveids” nūzeime. Ka tei byus saprūtama i skaidra, tod nabyus vajadzeigi ari nikaidi papyldu termini (regionaluo volūda itml.). Vysa golā gribīs pīsavīnuot cīnejamai J.Kurseitis-Pakules kundzei i lyugt vaļsts instituceju (ministreju, aģenturu, vaļsts plašsazinis leidzekļu i.c.) puorstuovus vairs naškiert latgalīšus nu latvīšu! Tai pat ari naškiert latgalīšu volūdu nu vaļsts volūdys, kai, pīvadumam, tū jau vairuokkuorteji ir izdarejuši Uzjāmumu registra puorstuovi. Aicynojam ari Latvejis vaļsts školuos nadaleit tautu divejuos daļuos – latvīšūs i latgalīšūs, bet gon vuiceit školānim par obejom latvīšu volūdys literarajom (rokstu) tradicejom, par literaturys vierteibom obejūs volūdys paveidūs, kai ari naaizmierst par Latgolys kulturviestures izskaidruošonu. Guodojam iz J.Kurseitis-Pakules atbolstu vaļsts volūdys lykuma preciziešonā, kab visim latvīšim byutu skaidrs, kas ir latgalīšu volūda i leidz ar tū, kas ir latgalīši – pylnvierteigi latvīši voi nazkas cyts?