Rēzeknis nūvoda dīnys

Rēzeknis nūvoda pošvaļdeiba šūvosor sovim īdzeivuotojim i gostim duovynoj nūtykumim boguotu nedeli – Rēzeknis nūvoda dīnys. Tuos nūteik pyrmū reizi i gostus aicynoj nu 9. leidz 16.juļam. Kotra dīna paruodeis atškireigu tematiskū nūkruosu – sacenseibys leluokuos zivs nūgiušonā, saimis styprynuos sovu draudzeibu, amateru teatri izklaidēs skateituojus, pučes plauks izstuodēs, sportisti i veseleiga dzeivisveida pīkritieji sasaceņss veikleibā i iztureibā, amatnīki vērs valī sovu darbneicu durovys, lauku uzjiemieji īpazeistynuos ar sovom saimisteibom, bet muokslinīki vysus prīcēs spylgtūs svātku koncertūs.

Pasuokumu cykls tiks uzsuokts 9. julī, kod nūvodā tiks svynāta Zvejnīku dīna. Ar makškeriešonys sacenseibom, dažaidom iudiņa disciplinom i sportiskom aktivitatem Nagļūs nūtiks centralais ituos dīnys pasuokums – „Zvejnīka dīnys sporta svātki”. Zivu giušonys saceņseibys i tematiskuos izstuodis planuotys ari cytūs pogostūs.

10. juļs – Saimis dīna. Tei bīs veļteita saimis styprynuošonai. Plašs pasuokums nūtiks Bierzgalī. Tuo ītvorā planavuots saimem veļteits dīvkolpuojums, radūšys darbneicys, sportiskys aktivitatis, koncerts, dažaidi puorsteigumi, bārnu zeimiejumu izstuode i tiks sumynuotys nūvoda saticeiguokips, talanteiguokuos, izpaleidzeiguokuos, nasavteiguokuos i kupluokuos saimes. Cytūs pogostūs saimis vuiceisīs veiduot ciļtskūku, pīsadaleis kūpeigajā paradā, īstudēs teatralizeitus uzvadumus, izpielies badmintona turniru i pīsadaleis dažaiduos cytuos nūtikšonuos.

Iz mirkli puorvērst dzeivi par teatri i baudeit zīdu, fotografeju i rūkdorbu izstuodis varēs 11.julī, kod nūvodā byus Teatra i izstuožu dīna. Plašs pasuokumu spektrs planuots Maltys i Nautrānu pogostūs, bet ari cytvīt nūvodā byus apsaveramys amaterteatru izruodis i muokslinīku izstuodis.

12.juļs – Sporta dīna – piļneibā tiks veļteita sportiskom aktivitatem. Rēzeknis nūvoda īdzeivuotoju i pašvaļdeibys darbinīku sporta svātki nūtiks Maltā. Komandys 6 leidz 8 cilvāku sastuovā spēlēs futbolu, strītbolu, volejbolu, saleidzynuos spākus viervis viļkšonā i cytuos disciplinuos. Bet visi tī, kurim pateik azarts i veseleigs dzeivisveids, aicynuoti pīsadaleit skriejīnī leidz Muokūņkolna viersyunei. Dreižuokajam skriejiejam i skriejiejai byus juodola naudys pūds.

Radūšys dūmys pošu veiduotūs dorbūs varēs paruodeit Amatnīceibys i muokslys dīnā 13.julī, kod pogostūs nūvoda dīnu apmekleituojim byus vareiba pīsadaleit radūšuos darbineicuos i īsavuiceit aust, tambūreit, peit grūzus, īsapazeit ar muola pasauli i rūtu darynuošonys prasmi. Darbneicu durovys vērs pūdnīki, audieja, kūka vyrpuotojs i uodys izstruoduojumu darbneica. Cetralais ituos dīnys pasuokums – keramikys cepļa izjimšona pūdnīka Stanislava Viļuma darbneicā „Cukrasāta”.

14. juļs byus Lauku dīna. Vysys dīnys garumā byus īspieja īpazeit dorba procesu Rēzeknis nūvoda uzjiemumūs, apmekleit lauku saimisteibys i “paraudzeit rūku” vušku cierpšonā i cytūs lauku dorbūs. Itamā dīnā nūtiks ari ikgadejo “Lauku dīna”, kū organizej “Latgolys lauksaimisteibys zynuotnis centrs” sadarbeibā ar Rēzeknis nūvoda pošvaļdeibu. Tuos ītvorā zemnīki i lauku uzjiemieji varēs īsapazeit ar jaunuokajom aktualitatem laukaugu audziešonā, īgiut sev interesejūšu informaceju par novitātem augu aizsardzeibys leidzekļu i māsluojuma jūmā, kai arī apsavērt tehnikys demonstriejumus.

Daudz i dažaiduos interesantuos aktivitašuos jaunīšim byus īspieja isasaisteit 15. julī Jaunatnis dīnys ītvorā. Jau nu vīnim dīnā visi aicynoti iz pasuokumu Ančupānu kartodromā, kur nūtiks strītbola, kvasa dzeršonys i gordumu iesšonys saceņseibys, jaunūs pop-rock grupu koncerts, kai arī lelais vokora koncerts ar taidom grupom kai „Musiqq”, „Bez PVN”, „Sovvaļnīks”, „Green Novice”, „Krampis” i „Out of Horizon” pīsadaleišonu. Doncuot DJ pavadeibā planuotys leidz reita gaismai. Ari pogostūs jaunīšim nūtiks atpyutys pasokumi, koncerti i šovi, bet bibliotekuos nūtiks dažaidys izstodis, kas saisteitys ar jaunatnis temu i tuos aktualuokajom problemom.

16. juļs – Dzīšmu i dzygu dīna. Lelais Rēzeknis nūvoda dīnu nūslāguma pasuokums, taipat kai Jaunatnis dīna, nūtiks Ančupānu kartodromā. Jau nu 12 stuņžu dīnā byus vareiba īsaguoduot kū nūdereigu amatnīku tierdzeņā, bet vīnā stuņdē ar bārnu i jaunīšu muokslinīciskuos pašdarbeibys kolektivu uzastuošonu suoksīs svātku koncerti. Bārnu i jaunīšu koncertā pīsadaleis popgrupys nu Rēzeknis nūvoda Maltys, Drycānu, Lendžu, Veremu, Bierzgaļa, Stoļerovys pogostim, gostu kolektivi nu Ludzys – “Spices” i “Cielaviņa”, kai arī televizejis bārnu šova “Mazo dziesmas Latvijai” uzvarātuoja Valērija Satibaldijeva. Vokora laikā byus vareiba nūvierteit nūvoda tautys mokslys kolektivu – dzīduotuoju, folklorys ansambļu, tautys dzygu kolektivu, pyutieju orkestra – prīšknasumus, gostu nu Boltkrīvejis Postavi rajona i Lītovys Kupišķu rajona uzastošonu, kai ari izbaudeit Ereņu i Uškānu saimes, Laura Reinika, muzykys grupu “Patrioti.LG”, “Latgolys damu pops” i “Tranzits” prīšknasumus. Lai reitu varātu sagaideit jautrai doncojūt, nakts koncertā i balā muzicēs “Boltī luoči”, Inga i Normuns, Atis Auzāns ar grupu i īrokstu muzykys spālātuoji (DJ).

Visi svātku pasokumi ir bez moksys. „Lai ari tagad ir gryuti ekonomiskī apstuokli, īguldūt leidzekļus itūs svātku organiziešonai, mes īprīcynuosim sovus dzeivuotuojus, duovynojūt jīm ostonis skaistys i pīpiļdeitys dīnys,” stuosta Rēzeknis nūvoda dūmis prīšksādātuojs Monvids Švarcs.

Ar Rēzeknis nūvoda dīnu programu var īsapazeit pošvaļdeibys škārsteikla lopā http://www.rezeknesnovads.lv

Visi laipni aicynuoti pīsadaleit myusu svātkūs!!!

Print Friendly, PDF & Email

Komentari

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]