Laikā nu 18. da 23. juļa Drycanūs nūtyka naformaluos izgleiteibys apvuiceibys “Latgolys bārni”. Apvuiceibys sasauce Rēzeknis i Viļanu nūvoda jaunīšus vacumā nu 16 leidz 22 godim.

Nedelis laikā nūmetnis dalinīki vairuok uzzynuo par Latgolys kulturu, modernū literaturu i muzyku, latgalīšu volūdys vaicuojumim, kai ari paraudzie sovys spiejis etniskū danču doncuošonā i teātra muokslā. Tū vysu kruošņuoku i jaunīšim saistūšu darē pīaicynuotī azartiskī vīslektori i nūdarbeibu organizatori : Arņs Slobožaņins (latgalīšu rok grupys “Dabasu Durovys” līders ), Sintija Ludbuorža (Rogovkys muzykalīs teātris “ArtTūrs” vadeituoja),  latgalīšu literats Raibīs Suņs i folklorys zynuotuoja Anna Briška.

Ekskurseju dīnā jaunīši brauce gostūs pi latgalīšu tradicionalūs orūdu meistarim i kūpā ar muzykantu Gunāru Igauni spielieja poļku Bykovā, a pi keramika Staņislava Viļuma “Cukrasātā” raudzē taisēt pūdus.

Apvuiceibu nūslāgumā, izmontojūt apgiutuos prasmis i īmanis, nūmetnis dalinīki izveiduoja sovu teatrali muzykalu interpretaceju par Kakarvīšu piļskolna teiku. Nūmetnis dorbā apvuiceibu vadeituoji izmontuo dažaidys naformaluos izgleiteibys metodis – Ice breaking, Team bilding, dorbs grupuos, sevis i cytu izviertiešonu.

Kū soka poši dalinīki :

–          Īsavuicieju “atslēgt pruotu”. Vaira cīnēt sovu dzymtū vītu, saknis i volūdu, spielēt teātri. –

–          (..) īsaklausēt cytūs i saprast, ka jī klausuos manī. Saprotu, ka defektus var aizstuot ar efektim. I vyspuor – es īsavuicieju dzeivuot! –

–          Nasakaunēt par latgalīšu volūdu. Atrast kontaktu ar pilneigi svešim cylvākim.–

–          (..) īsavuicieju aizstuovēt sovys tīseibys latgaliski. –

–          (..)  Struoduot grupuos, izprast cylvākus ar dažaidim vīdūklim, izvērtēt kotru situaceju. –

Par atbolstu apvuiceibu reikuošanā pateiceiba Rēzeknis nūvoda pošvaļdeibai, Drycanu pogosta puorvaļdis vadeituojai Skaidreitei Melnei i Drycanu vydškolys diorektorei Sarmeitei Mežulei.

Jaunīšu bīdreiba “KUKUŽI”