Kab īpazeistynuotu ar latgaliski rokstūšajim myusu dīnu autorim, Reigys Gruomotu svātku laikā Kongresu noma Mozajā zalā svātdiņ, 9. oktobrī, 12:30 stuņdēs nūtiks vuiceibu kinys „Latgolys kulturys montuojums” seanss i sasatikšona ar kinys taiseituojim i autorim.

Vuiceibu kina „Latgolys kulturys montuojums” ir audiovizuals stuosts par taidim latgaliski rokstūšim autorim kai Ilze Sperga, Anna Rancāne, Juoņs Ryučāns, Raibīs Suņs, Līga Seiksta-Deksne, Dagneja Bramane i dramaturge Danskovīte, atkluojūt nūvoda sovpateibu, latgalīšu pasauļa redziejumu i spieceigū pīdareibys izjiutu sovam nūvodam. Kinā pasaruod i vīna nu pādejūs interveju ar latgalīšu ailinīku i publicistu Ontonu Slišānu, kas paguojušuo gada beiguos aizguoja myužeibā.
Daļa kinys materiala taiseita paguojušuo goda Reigys Gruomotu svātku laikā, kod bīdreiba “Latgolys Studentu centrs” ciklā “Cyti godalaiki” sareikuoja lelu klauseituoju viereibu givušū latgalīšu aiļu vokoru “Vālais rudiņs”.

Vuiceibu kina „Latgolys kulturys montuojums” ir sataiseita, kab škoļnīkam i školuotuojam dūtu myusdīneigus vuiceibu materialus par latgalīšu literaturu i papyldynuotu vuiceibu procesu, vuiceibu metodiku i veicynuotu škoļnīku interesi par latgalīšu kulturu.
Reizē kina školuotuojam paleidz sagataveit taidus tematus kai Raiņs i juo luga „Jezups i juo bruoli”, kū papyldynoj intervejis ar gruomotys „Raiņs i juo bruoli” autoru rakstinīku Roaldu Dobrovenski i aktīri Juoni Paukštello – Jezupa lūmys spālātuoju 1983. goda teatra izruodē „Jezups i juo bruoli”.
Kinys „Latgolys kulturys montuojums” operators ir Gvido Skulte, scenareja autori Alvis Lapeņš i Valentins Lukaševičs, režisors-konsultants Varis Brasla.

Vuiceibu kinys „Latgolys kulturys montuojums” seansu i sasatikšonu ar kinys taiseituojim i autorim reikoj bīdreiba “Latgolys Studentu centrs” sadarbeibā ar Reigys Gruomotu svātku organizatorim Latvejis Gruomotizdevieju asociaceju i kinys taiseituojim – Latvīšu volūdys
agenturu.
Reigys Gruomotu svātku laikā bīdreiba “Latgolys Studentu centrs” sovā stendā pīduovuos plašu vysaidu Latvejis izdevieju gruomotu kluostu latgaliski i par Latgolu, ļaunūt svātku gostim īsapazeit ar Latgolys kulturu i myusu dīnu latgalīšu literaturu.

Valentins Lukaševičs – vīns nu kinys scenareja autorim. Foto: Leila Rasima

Ari itymā godā bīdreiba “Latgolys Studentu centrs” Reigys Gruomotu svātkūs Kongresu nomā pīsadola ar latgalīšu gruomotu goldu.

Gruomotu svātku dorba laiks:

7. oktobris 12 – 19

8. oktobris 10 – 19

9. oktobris 10 – 16:30

Apsavieršonai paguojušuo goda Gruomotu svātki i pasuocīņs “Vālais rudiņs”