Etnoroka grupa “Laimas muzykanti” gatavejuos ceļam iz Angleju

Ni “zemeņu laseit” ci “sieņs revēt”, nu pīsadaleit ar Latvejis Vaļsts svātkim saisteitūs pasuocīņūs Anglejis latvīšim.

“Asam spēlejuši tikpoš kai vysūs pasauļa kontinentūs, izjamūt Āfriku i Antarktidu”, soka grupys līders Artūrs Uškāns, kurs ar sovu saimi ir pīsadalejs ari LNT šova “Dzīdūšuos saimis” ūtrajā sezonā. “Anglejā gon byusam pyrmū reizi, deļ tuo ir cīši lela atbiļdeiba klauseituoju prīškā. Eipaši jau Anglejis latvīšu vacuokuos paaudzis i jūs bārnu i mozbārnu prīškā. Prūtama līta, ka ari jaunlaiku emigracejis latvīšim. Ka jau jī byus atguojušs iz Latvejis dzymšonys dīnai veļteitu pasuocīni, Latvejai jī nav zaudāti”, soka Artūrs.

Svareiguokī koncerti byus Londonā i Mensfīldā (Mansfield), paraleli byus ari izastuošonuos angļu publikai. Izastuošonuos vīrys i laiki angļu publikai pošu reizi teik planavuoti Anglejis pusē.

“Asam pateiceigi organizacejom, kas izajieme sareikuot svātku koncertus – Latvīšu Nacionalajai Padūmei Lelbritanejā, Latvejis Republikys viestnīceibai Londonā I Daugovys Vonogu fonda Londonys nūdaļai, kai ari personeigi cylvākim, kuri myus izaicynuoja pīsadaleit itymūs pasuocīņūs – Līnītei Zobens-East Londonā i Mensfīldys latvīšu kamerkuora “Novadi” dirigentam Helmutam Feldmanim”, soka Artūrs Uškāns.

Iz vaicuojumu, kaidu repertuaru “Laimas muzykanti” pīduovuos Anglejis koncertūs, Artūrs atbiļd: “Mes īmam nu Latgolys, deļ tuo pamotā byus latgalīši I latvīšu tautydzīšmu folklorys apdaris. Pyrma ceļuojuma iz ASV gon myusu spālātojam muzykys žanram daškeirom cytu nūsaukumu – “etnoroks” (ethno-rock), deļ tuo, ka ar jiedzīni “folkroks” (folk-rock), amerikani saprūt kū cytu – tū, kū pi myusim sauc par autordzīsmem – vīns cylvāks, vuordu i muzykys autors + vīna gitaram kam pīsavīnoj vēļ daži instrumenti. Ituo žanra slavanuokais puorstuovs ir Bobs Dilans (Bob Dilan). Mes spēlejam cytu muzyku – bolstomīs iz latvīšu i latgalīšu folkloru, kam dalīkam kuorteigu gitarys “zuodži, aktivu basa rifu i bungu komplektu. Pi tuo, itūšaļt ir mainejīs grupys sastuovs. Piec “Dzīdūšojom saimem” grupys gitarista i bundzinīka vītys ir aizvītuotys – bungys spielej muns dāls Matīss Uškāns, gitaru i mandolinu – Armands Varslavāns. Anglejis koncertūs pīsadaleis ari Līva Čingule (stabulis, dūdys, blokflauta, perkusejis), vijūli spēlēs Madara Leglere nu folkgrupys “Vīteri”. Pi basa, ruodīs Anglejis dzeivi vysvaira pīredzejušīs cylvāks myusu grupā – Kristaps Strods (vuicejīs basgitarys spēli „Tech Music School” Londonā). Es pots, kai vysod – kūkli, akardeonu, garmani…”, tai Artūrs.

“Laimas muzykantu” Anglejis latvīšim veļteitū koncertprogramu byus vareiba nūsaklauseit ari Latvejā. Vokorā pyrma izliduošonys iz Angleju “Laimas muzykanti” 16. novembrī 21:00 izastuos folkklubā “Ala” Reigā, Smilšu īlā 16.

Vaira informacejis par koncertim Anglejā 18. i 19. novembrī verīs: http://www.draugiem.lv/laimas-muzykanti/news/?p=5911652

Foto: Grupys publicitatis foto

Print Friendly, PDF & Email

Kalenders

Jun
15
Sai
all-day Gitys Palmys izstuode “Vilcienu ... @ Roberta Mūka muzejs
Gitys Palmys izstuode “Vilcienu ... @ Roberta Mūka muzejs
Jun 15 all-day
Nu 12. apreļa da 15. juņa Roberta Mūka muzejā Gaļānūs apsaverama muokslineicys Gitys Palmys gleznu izstuode “Vilcienu meitenes stāsts”. Izstuodē apsaveramys i vairuoku godu laika periodā radeituos, i publikai īprīšk naparuodeitys, kai ari pavysam jaunys[...]
10:00 Bruņojīs ar zynuošonom. Informat... @ Rēzekne, Kulturys i atpyutys parks
Bruņojīs ar zynuošonom. Informat... @ Rēzekne, Kulturys i atpyutys parks
Jun 15 @ 10:00 – 15:00
Bruņojīs ar zynuošonom. Informativuo dīna @ Rēzekne, Kulturys i atpyutys parks
Informativuo dīna dzeivuotuojim “Bruņojies ar zināšanām”.