Leidz 12. decembram Rēzeknis nūvoda F.Trasuna muzejā “Kolnasāta” apsaverama muokslenīka Juoņa Sprūdža (1920-1989) gleznu izstuode “Muna Latveja”. Muzeja kruojumā ir 24 juo gleznys, kū muzejam izduovynuojs muokslenīka dāls Uģis Sprūdžs, Latvejā zynoms vijūlnīks.

Izstuodis atkluošonā pīsadaleja ari muokslenīka mozdāls – Edmunds Sprūdžs – Latvejis Republikys vides aizsardzeibys i regionaluos atteisteibys ministrs.

Juoņa Sprūdža dzymtuo sāta ir Sakstagolā. Tī pi juo bruoļu sastateitajom līpom 2009. godā muokslenīkam atkluoja pīminis akmini. Dzims 1920. godā kai ūtrais bārns akmiņkaļa nu Varakļuonim Kārļa i sakstagalītis Veronikys saimē.

Gleznuošonu apgivs pošvuiceibys ceļā, nu muokslenīku aprynduos bejs pazeistoms i cīneits, pīsadalejs konkursūs i plenerūs, kur gives pīredzi. Sovus dorbus aizsuocs ar ellis kruosom, 1963. godā puorīmūt iz akvareli. Pīdzeivuojs izsyutejumu, saime cieški mainejuse dzeivisvītu, deļtuo Sprūdžā dobys ainavuos pasaruoda vysys Latvejis dobysskoti, kas ir juo dorbu tematika. Izstuodē skotomojūs dorbūs attāluota gon dzymtuo Latgola, gon Cēsu pusi, liktiņupe Daugova, Kandavys īlys, Ventspils ūstys kugi, Carnikavys zvejnīku laivys, kai ari portreti i klusuo doba.

Informaceju sagatavejuse Tamāra Tutina, muzeja golvonuo kruojuma globuotuoja

Kartenis nu muzeja arhiva –  J. Sprūdža dorbi