Vakar, 5. decembrī  svineigā ceremonejā Dailis teātrī jau treispadsmitū reizi piec kuortys Autoru bīdreiba AKKA/LAA pasnīdze Autortīseibu bezgaleibys bolvu.

Autori bolvys sajam gon par muzykalim, dzejis, rakstnīceibys i dažaidim cytim dorbim, kas plaši izmontuoti pādejuo goda laikā. Itymā godā vīna Autortīseibu bezgaleibys bolva ceļoj ari iz Baļtinovys pusi – par lugu ciklu Ontons i Anne, kas plaši izmontuots Latvejis amatierteatrūs, publicāts gruomotā Treis lugys, vīns skečs, īstudāts Latvejis Nacionalajā teatrī ar nūsaukumu Latgola.lv, kai ari fragmentūs demonstrāts Latvejis televizejā bolvu sajieme Anita Ločmele aba Danskovīte.

Par cytim bolvu sajiemiejim var izzynuot ITE

.

Autortīseibu bezgaleibys bolva dybynuota 1999. godā. Bolvu nadaškir žureja, nu laureatus nūsoka, bolstūtīs iz bezkaisleigu statistiku, kū nūdrūšynoj autoru dorbu dažaiduo lītuojuma datorizātu izskaite. Itū bolvu īgiust autori, kuru dorbi īprīškejā godā tikuši izmontuoti vysvaira vysdažaiduokajūs veidūs. Autoru dorbu bezgaleigū izmontuošonys īspieju deļ bolva īgivuse Autortīseibu bezgaleibys bolvys nūsaukumu.

Sastdiņ, 17. decembrī 13:55 Autortīseibu bezgaleibys bolvys 2011 pasnīgšonys sareikuojums byus vārojam Latvejis Televizejis pyrmajā kanalā.

2011. godā Anita Ločmele sajieme ari Latgalīšu kulturys goda bolvu “Boņuks 2010” kai goda cylvāks latgalīšu kulturā.

Karteņā: Anita Ločmele, Baļtinovys amatierteātra aktieri i režisors Valdis Lūriņš 2011. goda februarī latgalīšu kulturys goda bolvys “Boņuks 2010” apbolvuošonys ceremonejā. Foto “Vaduguns”

“Panoramys” sižets par izruodi Latgola.lv i tuos autori