Festivala BALTICA skatis Latgolā
Vysu oktobra i novembra mienesī 15 dažaiduos Latvejis vītuos nūsarysynuoja Starptautiskuo folklorys festivala “Baltica 2012” skatis, kab sasagataveitu festivalam i veiktu dalinīku atlasi. Skatēs pīsadaleja ap 150 etnografiskū ansambļu i folklorys kūpu, kai ari tautys muzykanti, lītišķuos muokslys meistari, omotnīki i stuostnīki.
Latgolā festivala skatis nūtyka Viļakā, Tilžā, Mežvidūs, Rikovā, Leivuonūs, Daugpilī i Dagdā, nu Latgolys kolektivi pīsadaleja koncertūs i skatēs ari Reigā.
Folklorys kūpys i etnografiskūs ansambļus vierteja profesionala žureja, tradicionaluos kulturys i attīceigūs jūmu eksperti, viertejūt kolektivus piec vairuokim kriterejim:
– programys atbiļsteiba tradicejai
– izpiļdejuma formys atbiļsteiba tradicejai
– izpiļdejuma tehniskuo meistareiba
– prīkšnasuma originalitate i muokslinīciskais spilgtums
– grupys kūpskots
Starptautiskais folklorys festivals BALTICA ir plašuokī, sabīdreibā popularuokī i pasaulī pazeistamuokī tradicionaluos kulturys svātki Baļtejis valstīs. Latvejā BALTICA nūtyks 2012. godā nu 5. leidz 10. juļam. Festivala tema itymā reizē byus CEĻŠ.
Oktobra suokumā, atkluojūt festivala skašu programu, Vileks nūvodā izskaneja taidi ceļavuordi:
“Ceļa leikums īt vīns aiz ūtra. Tys aizīt leikumu leikumim ar īvu kupanom, ar ceriņzīdu laimis lapiņom, ar kastaņu sveču gaismu. Ceļs vijuos i leidza sauc, bet putekli zam kuojom kai sudraba pērlis speid. Ir labi īt un zynuot – ceļs ir bezgaleigi skaists.
Dažaidus ceļus ejam vīns ūtram blokus – jauni i vaci, sīvys i veiri, bārni blokus skrīn klusi i gūdbijeigi. Re, dzeivis ceļā īsavej dzīsmis guojums, kas balynoj, baroj i izgleitoj latvīša dvēseli. Dzīsme puorskrīn puor pogolmu, paspielej bišu dryvā, izskrīn caur pļovu i vizinoj muokiuņūs.
Te gaisma pīsyt pi lūga sliedža i īīt ustabā. Jei mūdynoj myusu kotra dvēseli, duovoj vuordu, dzīsmi i īdūd spāku. Cīši blokus stuovam vīns pi ūtra dzeives ceļā, sasasaucam ar tautys vuordu, ar tautysdzīsmi. Na mute, bet sirds runoj tautysdzīsmē, kur gaismys vairuok par sauleiti.
Redzit nu, muosenis, mes naasam vīnys. Ustobā saguojuši sovejī, kab prīcuotūs par gaismu, kū sirdīs mūdyna tautys muzyka i dzīsme.”
Festivalu reikuoj Kulturizgleiteibys i namaterialuo montuojuma centrs sadarbeibā ar Latvejis Folklorys bīdreibu.
Vaira par tū, kai festivala skatēs guojs Latgolys vītuos skaitit:
BALTICA skate Rikovā i KARTEŅOS
Pīduovojom nalelu video īskotu BALTICA skatēs, paruodūt, kū žurejis komisejai, skateituojim i cytim kolektivim ruodeja latgalīši. Pi reizis juoatzeimoj, ka latgaliski dzīsmis skaneja na viņ Latgolys kolektivi, nu ari reidzinīku izpiļdejumā.
.
Sovvaļnīki – skate Dagdā
Mozī latgalīši – skate Dagdā
Rīkšova – skate Dagdā
Maskačkas spēlmaņi – skatē Reigā, VEF kulturys nomā
Upeitis jaunīšu folklorys kūpa – skatē Reigā, RTU
Karteņā: Rēzeknis jaunīšu folklorys kūpa “Vīteri”
Komentari