Koncerts “Taiseits Latgolā” izskaniejs

Vakar, 9. decembrī Reigā LMA Studentu klubā nūtyka itūgod leluokais latgalīšu grupu koncerts Reigā „Taiseits Latgolā”, kurā saguojušūs ar sovom uzastuošom prīceja grupys „Dabasu Durovys”, „Green Novice”, „Krampis” i dzīduotuoja Laura Bicāne.

Kai pyrmuo iz skatuvis kuopa Laura Bicāne, nūdzīžūt sovys gon seņuokys, gon jaunuokys dzīsmis. Vasalys div reizis izskanēja ari Laurys Eirovizejis dzīsme „Freakin’ out” – gon latgaliskuo verseja, gon konkursa verseja duetā ar Romānu Sladzi.

Kai ūtrī uzastuoja daugpilīši – grupa „Dabasu Durovys”, kuri kai vysod puorsteidz ar dzīšmu repertuara dažaideibu – nu ļusteigom rokenrola i regeja styla dzīsmem, leidz kai saceit „liriskim hitim”. Vokora gaitā izskaneja ari grupys ituo goda singli, kuru vydā ari leluokuo topu veiksmineica – dzīsme „Grēku fani”.

Piec „Dabasu Durovom” doncuotuoju zalu kustynuoja „Green Novice”, ļaunūt vysim doncuotuojim kuorteigi izpurynuot motus gon pi instrumentalim gobolim, gon īrastajom latgalīšu tautys dzīsmem folkroka/folkmetala stylā.

Kai pādejī uzastuoja grupa „Krampis” nu Leivuonim, kurim „Taiseits Latgolā” beja ūtrais koncerts vokora gaitā – pyrma tam grupa paspieja pīsadaleit konkursa „Burka” finalā klubā „NABAklab”, uzvarātuoju laurus i burku ar naudu gon atstuojūt cytom grupom. Grupys „Krampis” uzastuošonys laikā, klauseituoji  beja kluot ari dzīsmis pyrmatskaņuoma šaļtī – pyrmū reizi publiski tyka dzīduota dzīsme par Jersikys kieniņu Visvaldi.

Juosoka, ka iz koncerta suokumu saguojušūs apmaklātuoju nabeja cik daudzi, cik koncerta organizatori beja gaidejušs, nu iz koncerta ūtrū pusi saguoja daudzi vairuok ļauds i ļusteiga doncuošona, leidza dzīduošona guoja iz uh! Tys zeimoj, ka Reigys latgalīšim i tim, kam pateik latgalīšu muzyka, dzeive suocās piec divpadsmitim nakti.

Paļdis grupom par dzīsmem, atguojušim par doncuošonu i grupu podturēšonu i leluokais paļdis organizatorim, eipaši Arņam, par pasuocīņa nūrisi! Carams, ka iz prīšku byus arviņ jaunys muzykali latgaliskys sasatikšonys ari Reigā.

Pasuocīņs karteņuos – galerejā. Foto Edeite

Print Friendly, PDF & Email

Komentari

Kalenders

Jun
15
Sai
all-day Gitys Palmys izstuode “Vilcienu ... @ Roberta Mūka muzejs
Gitys Palmys izstuode “Vilcienu ... @ Roberta Mūka muzejs
Jun 15 all-day
Nu 12. apreļa da 15. juņa Roberta Mūka muzejā Gaļānūs apsaverama muokslineicys Gitys Palmys gleznu izstuode “Vilcienu meitenes stāsts”. Izstuodē apsaveramys i vairuoku godu laika periodā radeituos, i publikai īprīšk naparuodeitys, kai ari pavysam jaunys[...]