Beigusīs muzykys īrokstu īsnīgšona kasgadejai Latvejis muzykys īrokstu Goda bolvai, i sovys kandidaturys izskateišonai iz bolvys sajimšonu īsnīguši ari vairuoki latgalīšu muokslenīki i grupys.

Vysi īsnīgtī īroksti tiks nūdūti izviertiešonai žurejai, kuru puorstuov ap 50 dažaidu nūzaru puorstuovi. Viertēšona nūtiks leidz pot Zīmyssvātkim, kod rezultati tiks īsnīgti apkūpuošonai auditorkompanejai BDO. Paguojušā godā žurejis sastuovā beja ari latgalīši „Laimys muzykantu” i „Patriotu.LG” muzikis i komponists Artūrs Uškāns i aktīrs, komponists i „Bez PVN” muzikis Kristaps Rasims. Žurejis sastuovs ir maineigs, leidz ar tū itymā godā latgalīšu muziki tuos sastuovā nav.

Kandidatu vydā dažaiduos nominacejuos ir:

Lobuokais alternativuos muzykys albums – Sovvaļnīks ar „Bolts susātivs”;

Lobuokais tautys muzykys albums – folklorys kūpa Ilža ar „Ilža rūtoj, kaladoj”, Vīteri ar „Samovars”, kai ari myusdīnu muzykys izlase „SVIESTS IV”, kurymā ir īklauti vairuoki latgaliski izpiļdeiti goboli;

Lobuokais muzykys video klips – Sovvaļnīks ar „Nikas nav najaušs”, „Pa skurstini bolti dyumi” i „Aiz azara bolti bārzi”, Dabasu Durovys ar „Grēku fani”;

Lobuokais muzykys albums bārnim – šova „Mozūs dzīsmis Latvejai” uzvarātuoju, ludzuonīte Valērija Satibaldijeva ar „Atdziedi, dvēsele”;

Lobuokuo debeja – Vīteri ar „Samovars”; Valērija Satibaldijeva ar „Atdziedi, dvēsele”;

Lobuokuo dzīsme – Sovvaļnīks ar „Īt muna tauta”, Dabasu Durovys ar „Grēku fani” i „Vacais mašinists”;

Pylns izvirzeitūs kandidatu saroksts

Pyrmī rezultati nu auditorkompanejis byus zynomi 5. janvarī, kod eipašā presis konfereņcē tiks paziņuoti pīci pretendenti iz bolvu kotrā nu nominaceju.

Vīteri – Samovars

.

Sovvaļnīks – Aiz azara bolti bārzi

.

Valērija Satibaldijeva i Ilža – Skaista muižeņa