Atīdami Zīmyssvātki

Šudiņ ir Zīmys saulgrīži, kod dīna ir vysu eisuokuo, nu nakts garuokuo i piec ituos dīnys nakts paliks arviņ eisuokys, bet dīnys garuokys. Tai kai daudzys Zīmys saulgrīžu i Zīmyssvātku tradicejis ar laiku ir saplyudušs, tod šudiņ svātku gaideišona taidā tradicionali folkloriskā gorā ar tautys dzīsmem.

LaKuGa skaiteituoju viereibai Dainu škapī atrūnomuos latgalīšu tautys dzīsmis par Zīmyssvātkim i čyguonūs īšonu. Latgolā nu Zīmyssvātku (cytūs olūtūs nu Muorteņa dīnys ci Jaungoda) guoja čyguonūs ci kaļadnīkūs i tai turpynuoja leidz Zvaigznis dīnai 6. janvarī (cytur Latvejā čyguonūs guoja leidz Lendīņu Leluo gavieņa suokumam).  Teicieji par čyguonim  stuosta: “Tī nabeja eistī čyguoni, kas Zīmyssvātkūs guoja “čygonūs”, tī beja imitētī čyguoni, kas beja maskējušīs par čyguonim i atdarynuoja vysys čyguonu duovonu izpraseišonys izdareibym nu sātys saiminecom:  ar doncuošonu i ar vysaidu jūku taiseišonu. Golvonuo čyguonu praseiba beja ols, voi brandveina padzeršona.”

*

Zīmyssvātku dzīsmis

Atīdami Zīmas svātki
Atnes lelu dasu kuli.
Puišim dasu nadūsim,
Puiši vepru nabaruoja.

/Ludzys apr./

Atíīami Zīmas svātki,
Kū jī loba atnasuši?
Klāvā raibu raibaleņu,
Stallī lobu kumeleņu.

/Ludzys apr./

Lauzit skolu, pyutit guni,
Laidit Dīvu ustobā!
Dīveņš stuov aiz vuorteņu
Nūsveidušu kumēleņu;
Eite, muni duordzi kolpi,
Laidit stallī kumēleņu.

/Daugpiļs (Dvinskys) apr. Aulejis draudze/

Zīmas svātku reiteņā
Aptecēju gūvu klāvu;
Redzu gūteņu dzymušu
Zelteitīm radzenīm,
Zelteitīm radzenīm,
Sudabreņa nadzenīm.

/Ludzys apr./

*

Taisuos īt čyguonūs

Leli, mozi čyguoneni,
Maucītēs kurpeitēs:
Šei dīneņa, šei naksneņa
Ejamuo, takamuo.

Čyguonūs laizdamuos,
Valku garu kažučeņu:
Jau es poša labi zynu,
Kuodys dīnys čygonam.

/Leivuoni/

*

Apdzīduošona, kotrs daboj sovu tīsu

Atīt svātki treis buoleni,
Zyrgi līsi, puiši tukli,
Zyrgi līsi, nabaruoti,
Puiši tukli, olu dzer.

/ Rēzeknis apg. Sakstagols/

Troka buoba pīdzāruse,
Syuta suni lyuku plāstu.
Īt suneits rauduodams,
Asarenis slauceidams.

/Leiksna/

*

Čyguoni izalyudz ci nūzūg gon ādamys lītys, gon driebu gobolus

Saguojušas kaladneicas,
Prosa boltu vylnuoneišu.
Maņ pošai muosys auga
Vylnuoneišu nosuotuojis.

/Ludzys apr./

*

Dažaidys čyguonu dzīsmis

Dīveņš brauca puor azaru,
Boltus ladus lauzeidams;
Pēc Dīveņa svāta Muora,
Līpa lopas kluosteidama.

/Kruoslovys apr./

Kur tu teci, moza pele? Koladu, koladu!
– Da orūda zierņu zogtu.
Kai tī tevi nasagiva?
– Es ībāgu aleņā.
Kai tu tī nanūsoli?
-Sasakiuru kaula guni.
Kai tu tī nasadagi?
– Sasaspraužu odotuos.
Kai tev asnis natecēja?
– Sasazīžu vacu svīkstu?
Kur tu jēmi vacu svīkstu?
-Vacuos muotis pyureņā.
Kur tei jēme vacuo muote?
-Raibas gūvis ciceitī.
Kur tei jēme raiba gūvs?
-Zalis zuoles galeņā.
Kur palyka zaļa zuole?
-Dīva vērši nūāduši.
Kur palyka Dīva vērši?
-Dīva dāli (kolpi) nūdzynuši.
Kur palyka Dīva dāli (kolpi)?
-Uz kaļneņa pili taisa.
Kur palyka tei pileite?
-Zylòm gunim sadaguse.
Kur palyka tuos plentenis?
-Dīva vystas izkosušas.
Kur palyka Dīva vystas?
-Līpeņā salākušas.
Kur palyka tei līpeņa?
-Dīva dāli nūcārtuši,
Dīva dāli nūcārtuši
Ar osīm zūbinīm.
Kur palyka tuos skaideņas?
-Jiureņuos salakstēja.

/Ludzys apr./

Začeits munu tāvu syta
Ar pakalis kuojeņuom;
Byutum gauži rauduojuse,
Aiz smīkleņa navarēju.

/Leivuoni/

Buoleņ munu gaiguleņ,
Kur gulēji šū naksneņ’?
-Zam prīdeites, zam egleites,
Skuju kluotu paladzeņu.

/Ludzys apr./

Čiguoņeica Dīva lyudze,
Lai dūd meitys kuortys mest;
Kur’ atnas šņaba kvartu,
Tai izmat lobu kuortu.

/Vitebskys gub./

Čyguonūs laizdamīs
Uodys lamžys apsavylku;
Suni lamžys apāduši,
Pūgys vīn pamatuši.

/Leivuoni/

*

Čyguonus dzan pa celi, čyguoni pasateic par gastiņci i aizīt

Dīvs ir gon, Dīvs ir gon
Loba veira sieteņā,
I gaileits iztecēja
Madūtuom kuojeņuom.

/Leivuoni/

.

.

Vīteri – Atīdami Zīmassvātki

.

.

Kartenis nu bīdreibys “Latgolys Studentu centrs” arhiva – dažaidu godu guojīni čyguonūs Viļānūs, Bukmuižā i Berkenelē

Print Friendly, PDF & Email

Komentari

Nūtikšonu kalendars

Jun
30
Cat
vysu dīnu Džeinys Gavaris gleznu izstuode ... @ Maltys viesturis muzejs
Džeinys Gavaris gleznu izstuode ... @ Maltys viesturis muzejs
Jun 30 vysu dīnu
Džeinys Gavaris gleznu izstuode "Mantojums" @ Maltys viesturis muzejs
Da 30. juņa Maltys viesturis muzejā var apsavērt dzīsmineicys, gleznuotuojis i dzejneicys Džeinys Gavaris gleznu izstuodi “Mantojums”. Poša Džeina Gavare stuosta: “Izstuode ir kai turpynuojums viestei par mīlesteibu. Izstuode ir par tū, kuo „pādūs” mes[...]
Jul
1
Pīk
20:00 Grupys “Reibums” koncerts @ "Fresh Terase"
Grupys “Reibums” koncerts @ "Fresh Terase"
Jul 1 @ 20:00 – 21:30
Grupa “Reibums” ir cālusēs Rāznys azara krostā Kaunatā Covid īrūbežuojumu laikā, kod vīneiguos izklaidis vareibys beja izklaidēt sevi pošim. Tok dalinīku saspēlis pyrmsuokumi meklejami jau lobu laiku īprīšk.   Grupa “Reibums” spielej vīnkuoršu, jautru dzeivū[...]