Fotokonkursa „Latvejis fotografi atkluoj Latgolu” dorbu izstuode Preiļūs

Preiļu Kulturys nomā leidz 13.martam apsaverama fotokonkursa „Latvejis fotografi atkluoj Latgolu” (Latvijas fotogrāfi atklāj Latgali) prezentacejis izstuode.

Fotokonkursu „Latvejis fotografi atkluoj Latgolu” pārnejuo gods suokumā izsludynuoja Preiļu nūvoda dūme i Latgolys fotografu bīdreiba. Konkursā pīsadaleja 36 autori – nu Latgolys, Reigys, Lelvuordis, Madūnys i Krustpiļs nūvodim i c., kuri kūpumā īsnīdze 218 fotografejis. Dorbi tyka vārtāti 3 kategorejuos: Cylvāks, Doba, Nūtikšona (Notikums). Žūrejis komisejā beja Pēteris Korsaks – foto viesturnīks, Janīna Kursīte-Pakule – Saeimys deputate, Latvejis Universitatis profesore, Rihards Pīks – politiks, bejušais kinorežisors i kino darbinīks, Vladislavs Paurs – gleznuotuojs, Rēzeknis Augstškolys asociātais profesors.

Izstuodē apsaveramys gūdolguotuos i cytys augstys kvalitatis fotografejis. Kotrai ir sovs stuosts, viestejums. Saīt ap symtu stuostu par Latgolu vīnā izstuodē. Zynomys vītys atsauc atmiņā pīdzeivuotū i stuostus, nazynomys ļaun vaļu fantazejai.

Kruosainuos i malnboltuos biļdēs īmyužynuotuos Latgolys vaibsti ir dažaidi. Nu bārnu rūtaleigom sejom leidz ļaudim ar siermom golvom. Nu bazneicys leidz piertei. Nu romantiskom lauku ainovom leidz aizmierstim, atstuotim nūstyurim, kurūs fotografs saskatejs sovpateibu i spiejs paruodeit cytā – muokslys gaismā.

Leluokuo daļa dorbu līk dastuot i padūmuot tuoļuok. Ir prosta šmukys fotografejis, iz kurom  prīca pasavērt. Vysvairuok fotografeju atbylst kategorejai Doba, vysmozuok – Nūtikšonys. Sakriteiba voi lykumsakareiba? Pyrmuo vīta nominacejā Doba – dorbam ar nūsaukumu „Apsastuojs laiks” (Apstājies laiks). Pyrmuo dūma – cik stereotipiski! Nu ūtrys pusis verūtīs – tys labi, ka izsauc emocejis, rūsynoj uzdūd vaicuojumus, pīvadumam, iz kurīni īmam i cik iļgi vēļ?

Izstuodi ir vārts apmeklēt, lai radzātu, kaidu Latgolu radz konkursanti, atrostu dorbu, kas uzrunoj, voi vīnkuorši pasavārtu iz skaistom i kvalitativom fotografejom.

Preiļūs izstuode apsaverama leidz 13.martam Kulturys namā (dorba dīnuos nu 8.00 leidz 17.00), bet organizatori viestej, ka dorbi tiks izstuodeiti ari cytuos Latgolys vītuos.

Vita Briška

 

Karteņa: autoris foto

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]