Pūdnīka Pītera Gailuma laiks muolā

Pūdnīka Pītera Gailuma laiks muolā

Ludzys nūvodpietnīceibys muzejā nu 20. marta da 5. apreļam apsaverama Latgolys pūdnīka, J.Soikāna Ludzys muokslys školys Nautrānu filialis pedagoga Pītera Gailuma 50 godu jubileja izstuode „Muns laiks” (Mans laiks), kurš uzrunoj skateituoju caur trauku daudzveideigom formom, fakturu rokstu, glazuru klusynuotūs skanejumu i karteņom, kuruos paruodeitys nūzeimeigys muokslinīka dzeivis šaļts.

Reizem saīt tai, ka īraudzeit i pamaneit tyvuokū ir gona gryuts. Juo kluotbyutne ir pošsaprūtama i nūzeimeigums klivs par kasdīnys daļu. Puora sūli. Atkuope. Redzis ainova saīt pavysam cyta. Skatīņs nūlosa – sūpluok ir cylvāks, kurš ir bejs uzticeigs sovim sapynim i mierkim. Vaļsts ekonomiskuos gryuteibys, politiskī moldi i sabīdreibys vierteibu kiulini ir bejuši tepoš blokus, nu nav nūvirziejuši tyvuokū nu ceļa pi sovys „Vizbuleitis”. Nanūdūt Dīva dūtū duovonu nabyuteitbai ir vierteiga cylvāka gora īzeime.

Tai Latgolys pūdnīks, J.Soikāna Ludzys muokslys školys Nautrānu filialis pedagogs Pīters Gailums kūpā ar dzievisbīdri gūdam kolpoj „muola dryvā”, školoj jaunūs muokslinīkus, kūp i iztur saimis sātu Jaungailumūs zīdūša duorza īskautā vītā. Caur guņskrystobom sauleitē cieļs naskaitomus traukus.

Muokslinīka dorbi ir daudzuos Latgolys i Latvejis sātuos. Ludzuonīšim kai ūtrajim teik duovuota īspieja apsavērt Pītera Gailuma 50 godu jubileja izstuodi „Muns laiks” Ludzys nūvodpietnīceibys muzejā. Izstuode pyrma tam bejuse apsaverama Ilziskolna pogostā.

Ekspoziceja apsaverama da 5. apreļam – Zaļajai (Lelajai) catūrtdīnei, kod 12:00 izstuodis nūslāgumā, byus vareiba sasatikt ar pūdnīku, pasumynuot gaviļnīku skaistā dzeivis jubilejā i sajimt duovonu nu meistara rūkom. Duovonys sajimšonai ir tik treis nūsacejumi:

1.    Juoaizīt iz izstuodi i viereigi juosaver;
2.    Pareizi juoatbiļd iz 6 vaicuojumim (vysys atbiļdis ir radzamys ekspozicejā. Divom ir vajadzeigys nalelys prīškzynuošonys myusdīnu Latgolys muokslys i amatnīceibys dzeivē). Atbiļdis juopīroksta anketā i juopamat muzeja administracejā da 5. apreļa 11:00.
3.    Juoīsarūn iz sasatikšonu ar muokslinīku Zaļajā (Lelajā) catūrtdīnē.
Jiusu viereibys vaicuojumi:
1.    Cik gaismys lukturu rūtoj meistara klieti?
2.    Kai sauc kopejneicu Rēzeknē, kurai pūdnīks taisieja traukus?
3.    Kaidys divejis popularuokuos rogu formys ir rūtuojūšom vucynu figurom Pītera Gailuma traukūs?
4.    Kaidys Latgolys muokslineicys dorbu var redzēt vīnā nu karteņom?
5.    Puora traukus Pīters Gailums ir darynuojs kūpā ar kaidu nu Latgolys amatnīkim. Nūsaucit juo vuorda!
6.    Cik putynu ir pagrīzuši mugurys trauki i verās „pasaulī”?

Pateikamu i viereigu vieršonūs vielej J.Soikānu Ludzys muokslys školys direktore Sandra Vorkale

Kartenis – foto Sandra Vorkale:

1.Pīters Gailums i cepļa izjimšona.

2. Pītera Gailuma bļūdys portrets.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]