Mes kotrs kasdīnā fotografejam. Myusdīnu fotokamera ir kotram – pasasokūt zynuotnis atteisteibai i mobilūs telefonu tehnologejom. Nu ir vaicuojums – voi tei ir fotomuoksla? Varbyut vīnkuorši sovys kasdīnys nūfiksiešona, kab palyktu pīmiņā. Fotomuokslai ir seneja viesture, i ari Upeitē fotoizstuožu tradicejai ir seneja viesture, kuru 1972. godā aizsuoka Ontons Slišāns, apvīnojūt fotoamatīrus i jūs dorbus izliktu apsavieršonai cytim. Ontons sovulaik sataisiejs daudz i dažaidu fotoizstuožu cyklu, par pīmāru, „Laimis zeme – bierneiba”, „… es radzu pasauli”, „Vysom lobojom rūkom – paļdis”, „Saknis” i vēļ vaira kai 40 izstuodis. Izstuodis tyka izvītuotys kolhoza „Cīņa” vaļdis uzgaidamajuos telpuos i tuos beja labi apmaklātys i īcīneitys. Ari nu 1997. goda – nu laika, kod itymuos telpuos atsarūn Upeitis biblioteka, tradiceja napagaist i atsateista. Par Upeitis fotografu darbeibu līcynoj sasaglobuojuse fotoizstuožu atsauksmu gruomota i vysu fotoizstuožu materiali personeigajā arhivā.

Ir pateikami, ka daudzi fotoamatīri klivuši par fotomuokslinīkim i turpynoj dorbuotīs itymā nūzarē. Upeitē vīns nu taidim ir Pīters Skangaļs, kur sovus dorbus ir pīduovuojs apsavieršonai jau nu pyrmuos fotoizstuodis Upeitē. Itūgod – 2012. goda janvarī jis atroda sev dūmubīdrus – Upeitis pamatškolys školuotuoju Irēnu Romku i izjiemieju Santu Matisāni, ar kū kūpā nūdybynuota fotogrupa „Izpausme”, kas turpynuos prīcēt Upeitis ļauds ar šmukom karteņom.

Itymā godā fotoizstuožu tradiceja Upeitē sviņ opolu 40 godu jubileju. Pyrmuo fotoizstuode „Ikdienas ritmi” tyka atkluota 1972. goda martā i ari itymā godā, kai pyrma 40 godu 2012. goda 23. martā Upeitis bibliotekā tyka atkluota fotoizstuode, kurā apsaverami Upeitis fotografu grupys „Izpausme” izstuode „Kaidu skaistu laiku pīminūt” (Kādu skaistu laiku atceroties). Izstuode atkluota dīnā, kod Upeitē beja ari Kūkovys nūvoda folklorys svātki „Lidu, lidu vanadzini”, deļ tuo izstuodis atkluošonā skanieja ari dzīsmis i muzyka. Paļdis Upeitis jaunīšu folklorys kūpys meitom par dzīsmi, Upeitis tautys noma vadeituojam Andrim Slišānam par paleidzeibu i fotomuokslinīkim par karteņom!

Prīcej, ka fotomuoksla nazyud i Upeitis fotografu grupa ar laiku pīsaisteis jaunus interesentus, dalinīkus, kurim pateik fotografēt, i kuri gribēs sovus dorbus paruodeit ari cytim.

Izstuode vēļ lobu laiku byus apsaverama Upeitis bibliotekā – meili gaideiti gostūs vysi apsavērt grybātuoji!

Upeitis bibliotekys vadeituoja – Mārīte Slišāne

Kartenis nu fotoizstuodis atkluošonys Upeitē i senejūs izstuožu arhivim