Zīmeļlatgolys nūvoda bārni dzīž i doncoj Drycanūs

Zīmeļlatgolys nūvoda bārni dzīž i doncoj Drycanūs
Saulainā i pavasareigā dīnā apreļa vydā Drycanu vydsškolā sasapuļcieja Zīmeļlatgolys nūvoda bārni i jaunīši iz folklorys sadzīduošonuos svātkim „Putineni šmuki dzīd”.

Svātkūs pīsadaleja Rēzeknis piļsātys i nūvoda, Viļānu, Ludzys piļsātys i nūvoda folklorys kolektivi – Drycanu vydsškolys folklorys kūpa „Driceiši” (vad. Irēna Ivanova), Gaigalovys pamatškolys folklorys kūpa “Purineņš” (vad. Rasma Igaune), Kaunatys vydsškolys folklorys kūpa “Rāznaviņa” (vad. Sandra Viša), Nautrānu vydsškolys folkloras kūpa “Rogovka” (vad. Anna Garanča), Lūcejis Rancānis Makašānu omotu vydsškolys  folklorys kūpa “Kūkleite” (vad. Marija Andina),  Līpu pamatskolys folklorys kūpa “Liepiņa” (vad. Ināra Blinova), Viļānu nūvoda folklorys kūpa “Biteites” (vad. Inga Stafecka), Kolnazaru Katuoļu pamatškolys folklorys kūpa (vad. Irēna Ivanova), Jaunstrūžānu pamatškolys folklorys kūpa (vad. Gunita Gleizdāne),  Rykovys pamatškolys folklorys kūpa “Mozō Rykova” (vad. Iveta Dimzule),    Ludzys muzykys školys folklorys kūpa (vad. Dace Tihovska ), Nierzys pamatškolys folklorys kūpa “Spryguļi” (vad. Anita Klovāne), Rēzeknis KN folklorys draugu kūpa “Vīteri” (vad. Sandra Stare).

Vysa vuiceibu goda laikā bārni vuicejuos dzīsmis, rūtalis par putynim, īsapazyna ar tradicejom, mutvuordu daiļradi saisteibā ar putynu tematiku latvīšu folklorā. Goda laikā giutuos zynuošonys i prasmis jī ruodeja folklorys svātkūs, jo pasuocīņa dīnā Drycanu vydsškolā dorbuojās rodūšuos darbneicys i interaktivuos nūdarbis, kur bārni poši taiseja putynus, kruošņu kūpdorbu – gobelenu ar putynim, stuosteja teikys, minieja meiklis, klausejuos, atpazyna i atdarynuoja putynu bolsus, darynuoja putynu byureišus. Svātku koncertā kotra kūpa ruodeja sovu snīgumu – prīšknasumu – eipaši sagataveitu itim svātkim. Prūtama līta, naiztika ari prīca i ļustis kūpeigūs daņčūs i dzīsmēs.

Piec koncerta vysi dalinīki devēs izgleitojūšā izbraucīnā. Beja iz maestro Ontona Matvejāna atdusys vītu, nūlīkūt pučis i atstuojūt uobeļneicu zareņūs poštaiseitus putineņus kai pavasareigu sveicīni nu dzīdūšajim bārnim.

Drycanu Rūmys katuoļu draudzis bazneicā prāvests Māris Laureckis izrunuoja kluotasūšūs i atkluoja folklorys i kristeiguos ticeibys kūpsakareibys. Školuotuoja – katehete Silvija Laizāne īpazeistynuoja ar Drycanu bazneicys viesturi. Jei vierse viereibys iz barona Gustava Manteifeļa personeibu, kurīs atsadus bazneicys duorzā, jo dzievis laikā jis deve lelu īguļdejumu latgalīšu raksteibys saglobuošonā i folklorys vuokšonā. Taipat tyka akcentāts drycanīši gruomotizdevieja Vladislava Lōča davums latgalīšu gruomotnīceibys atteisteibā. Golā kai vysu jaunuokū laiku folklorys īdzeivynuotuojs pogosta dzeivē tyka izceļts Ontons Matvejāns. Juo atraitne Anna Matvejāne prezentieja dzeivisbīdra daiļradi izdūtajuos gruomotuos i duovynuoja kotrai kūpai Ontona Matvejā gruomotu „Rūtoj, rūtoj”, kurei byus nūdereiga kotra kolektiva dorbā.

Dīnys izskaņā svātku dalinīki devēs iz Kakarvīšu piļskolnu, kur vysus jau gaideja Drycanu folklorys kūpa „Bolta vīšņa” Andra Ereņa vadeibā. Uora nūdarbeibuos vysi kūpā dzīduoja tautysdzīsmis, guoja rūtaļuos ap guņskuru, stuosteja teikys i cīnuoja ar peirāgim, kū beja saryupiejuši Kantinīku pogosta firma SIA „Anēls”. Piec darbeiguos dīnys školys ustobuos vysi ari prīcu i azarta ļuovēs svaigajam pavasara gaisam, saulei i piļskolna nūslāpumainai aurai. Vysim beja gaišs nūskaņuojums i gandarejums par giutajim īspaidim.

Svātku reikuotuoji soka lelu paļdis vysim folklorys kūpu vadeituojim i dalinīkim par Latgolys folklorys tradiceju izpratni i kūpšonu!

Paļdis vysim, kurī atbaļsteja svātkus: Rēzeknis nūvoda Izgleiteibys puorvaļdei, Interešu izgleiteibys dorba koordinatoram Guntaram Skudram, Drycanu pogosta puorvaļdei, Zīmeļlatgolys nūvoda folklorys kūpu koordinatorei Rasmai Igaunei, Drycanu vydsškolys administracejai i vysam školuotuoju kolektivam, tehniskaim darbinīkim, školys jaunīšim! Pateiceiba par daleibu pasuocīņa reikuošonā ari prāvestam Mārim Laureckim, Annai Matvejānei i folklorys kūpai „Bolta vīšņa”, firmai SIA „Anēls” i personeigi Jeļenai Šilovai.

Drūsai var saceit – folklorys svātki Drycanūs izadeve! Kab vysim lūbuos bārnu i jaunīšu folklorys festivalā Jelgavā ītuo goda 26. i 27. majā, kur sabrauks dalinīki nu vysom Latvejis molom, kab vīnuotūs kūpeigā dzīsmē i daņčūs!

Drycanu folklorys kūpys „Dryceiši” vadeituoja Irēna Ivanova

Print Friendly, PDF & Email

Kalenders

Apr
18
Cat
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]