LaKuGa kai īprīšk tai i tāņ rauga stuosteit par latgalīšu muziķu aktivitatem na viņ latgaliskajā, nu ari cytu volūdu lauceņūs. Niu grupys „Patrioti.lg” dalinīks Jurs Ostrovskis pīduovoj jaunu dzīsmi „Mana Laime”, kurei pīsadola „Latvejis Šlageraptaujis” pavasara pūsmā. Dzīsme atvasynuota nu pasauļs tautu dzīsmis „Tumbalalaika” i latvyskajā versejā ir jaunums. Latvyskuo teksta autors ir Jurs Ostrovskis.

Dzīsme topuse sadarbeibā ar skonu īrokstu studeju „Meduza Sound” (skonu režisors – Edgars Skrāgis) i īrokstā pīsadalejuši Artūrs Uškāns (dzīsmis aranžejums, klavīris, kontrabass, akordeons), Kristīne Kārkle-Puriņa (vijuole, bolss), Armands Varslavāns (gitara) i Mārtiņš Linde (perkusejis).

Speciali „Latvejis Šlageraptaujai” dzīsmei izjimts ari video klips. Klipā pīsadola Jurs Ostrovskis i deju studeja „Malika” nu Daugovpiļs. Dejis horeografeja i kostimu dizains – Natālija Rižkova, klipa režisors – Arvīds Babris.

Dzīsmi aptaujā var atbalsteit, bolsojūt ar nu „Latvejis Aveizis” pīktdīnis dalykuma „Nedeļa kārmanā” izgrīztom anketom.

Deju studeja „Malika” i Jurs Ostrovskis izsoka pateiceibu projekta dalinīkim i „Latvejis Šlageraptaujis” skateituojim, vielejūt pavasareigu nūskaņuojumu!

Vaira par Juri Ostrovski skaiti i dzīsmis klausīs: http://www.draugiem.lv/ostrovskis

Jurs Ostrovskis – Mana laime

Karteņa – foto Džeina Saulīte