8. junī Vuorkovys nūvoda Vuorkovys vydsškolā iz konferenci „Latgalīšu volūda i latgaliskuo identiate” sasatiks Latgolys piļsātu i nūvodu pošavaļdeibu puorstuovi, Latvejis publiskuos puorvaļdis institucejis, Latgolys planavuošonys regiona puorstuovi, eksperti, navalstiskuos organizacejis i masu medeji.

Konferencis mierkis ir atrast i pīduovuot risimuojumus latgalīšu volūdys i kulturys stiprynuošonai i popularizēšonai. Taipat konferencis laikā paradzāts izstruoduot prīšklykumus ituo goda augustā Rēzeknē nūteikūšajā pasauļs latgalīšu konferencē.

Konferenci „Latgalīšu volūda i latgaliskuo identitate” organizej Latvejis Republikys Kulturys ministreja i sasatikšonā pīsadaleis ari poša kulturys ministre Žaneta Jaunzeme-Grende, taipat ari Kulturys ministrejis parlamentaruo sekretare Inese Laizāne.

Konferencis laikā dalinīki struoduos 4 dorba grupuos i viersīs iz latgalīšu volūdu i latgaliskū nu vairuokim skotu punktim – nu juridiskūs vaicuojumu, izgleiteibys vaicuojumu, lokaluos identitatis i masu medeju pusem. Juridiskūs vaicuojumu dorba grupu vadeis Tīslītu ministrejis parlamentarais sekretars Juoņs Bordāns i dorba kuorteibā paradzāti vaicuojumi ar latgalīšu volūdys juridiskuo statusa saisteitim vaicuojumim, izgleiteibys vaicuojumu dorba grupu vadeis profesore Lideja Leikuma, viertejūt latgalīšu volūdys vītu izgleiteibys saturā Latgolā i Latvejā, lokaluos identitatis dorba grupu vadeis publiciste i latgalīšu kulturys aktiviste Ilze Sperga, kurys vadeituo dorba grupa sprīss par latgalīšu lokaluos identitatis, latgalīšu kulturys i latgalīšu sadarbeibys vaicuojumim, bet medeju dorba grupa NEPLP padūmis lūcekļa Daiņa Mjartāna vadeibā viersīs vaicuojumus par latgalisku medeju telpu.