Rokstu sagataveja: portals lakuga.lv

6. decembrī 16 stuņdēs “Koka Rīgā” (Kruosuotuoju īlā 12, Reigā) nūtiks Latvejis Kulturys akademejis tradicionaluos dzīduošonys grupys “Saucējas” jaunuo albuma i gruomotys “Gona bija skeistu dzīšmu” atkluošonys koncerts. Izdavums veļteits Zīmeļlatgolys teiciejis Margaritys Šakinys (1926–2014) symts godu jubilejai, izceļūt juos pamastū boguoteigū dzīšmu montuojumu i nūzeimeigū lūmu grupys “Saucējas” tapšonā, informej grupys puorstuovi.

Koncertā “Saucējas” izpiļdeis kai jaunajā albumā īkļautuos, tai ari cytys dzīsmis nu teiciejis plotuo repertuara. Pasuokuma ūtrajā daļā sevkurs aicynuots iz kūpeigu sasadzīduošonu.

Margarita Šakina beja “Saucēju” pyrmuo školuotuoja, nu kurys grupys dalineicys vuicejuos Zīmeļlatgolys daudzbaļseiguos dzīduošonys tradiceju. Juos dzīsmis palyka par nūzeimeigu daļu nu grupys muzykaluos identitatis i īdvasmuoja tuos rodūšū darbeibu iz prīšku. 2026. gods 13. martā palyka symts godu nu teiciejis dzimšonys, i jaunais izdavums ir veļtejums juos dzeivei, dzīduošonai i gribiešonai nūdūt dzīsmis paaudzem iz prīšku.

“Tys ir apbreinuojamai, cik lelu ītekmi Margaritys personeiba pamatuse iz vairuokom folklorys kusteibys dalinīku paaudzem i cik boguoteigu Zīmeļlatgolys dzīšmu montuojumu jei mums duovuojuse. Margaritai beja svareigai, kab juos dzīsmis turpynuotu skanēt i natyktu aizmierstys, partū myusu izdavumā īkļauti ari dzīšmu vuordi i notys. Vuicitēs, dzīdit i vuicit cytus!” aicynoj “Saucējas”.

Albumā “Gona bija skeistu dzīšmu” dzierdamys folklorys kusteibā jau zynomys, kai ari da šam mozuok zynomys Margaritys Šakinys dzīsmis. Sūpluok dzīšmu īrokstim izdavumā īkļauti tūs teksti i notys, informaceja par teiciejis dzeivis guojumu, repertuaru, sadarbeibu ar “Saucējām” i komentari, kas atkluoj dzīšmu muzykalū i funkcionalū kontekstu. Izdavumu papyldynoj pošys Margaritys stuosti i atminis. Vairuoku dzīšmu īrokstūs pīsadalejušys ari dzīduotuojis, kurys beja kluotyn “Saucēju” pyrmsuokumūs, i garmanis spālātuojs Oskars Patjanko. Albumā puorstuovātys teiciejis īmeiļuotuos temys par dorbu, kuozom, mameņu, kai ari goreiguos dzīsmis. Īrokstūs “Saucējas” raudzejušys saglobuot Margaritys dzīduošonys manīri, melodeju variacejis i izpiļdejuma raksturu, reizē kotrai dzīsmei pīškirūt ari sovu muzykalū kruosu i izjiutu. Albuma nūslādzūšuo dzīsme ir rodūšs eksperiments – sadarbeiba ar elektroniskuos muzykys muokslinīku DJ Monstu (Uldi Cīruli).

Albumu izdūd kulturys menedžmenta centrys (KMC) “Lauska”. Īrokstus 2025. i 2026. godā skaņu īrokstu studejā “GEM Plus” veice skaņu īrokstu režisors Gatis Gaujenieks. Izdavuma muokslinīks ir Džeremijs Smīds (Jeremy Smedes), sovutīs albuma nūformiejumā izmontuots Jantys Mežys diplomdorbs, kas izstruoduots, absolvejūt Latvejis Muokslys akademejis Vizualuos muokslys nūdaļu.

Izdavumu “Gona bija skeistu dzīšmu” varēs nūpierkt nu 6. decembra KMC “Lauska” sātyslopā, bet dzīsmis jau niu var klauseitīs vysuos digitalajuos straumiešonys platformuos.