„Veikala dadzynuošona” ir pyrmuo dzīsme, kurā grupa izmontuojuse dzejūli. Dzejūļs – „Meikulam sābri nūdadzynuoja veikalu” atrūnoms latgalīšu postmodernista V. Lukaševiča dzejūļu gruomotā – „Bolti burti”.

Dzīsme ir par apsvīdeigu, nu nagūdeigu izjiemieju – Meikulu, kurs juku laikūs ar viļtu nūpiercs bejušū kolhoza veikalu, pi tuo kruopās ar svorim, kurī ruoda vaira kai prece eistineibā sver. Tū izzinoj piercieji i nūdadzynoj veikalu. Veikalā sadag ari juo vacuo muote – Mareja, nu Meikuls tū nivīnam nasoka, jo saprūta, ka ir dalieji vaineigs juos nuovē.

Īrokstā pīsadaleja: Aleksandrs Tamans (bungys), Mihails Šaiters (basgitara, tausteni), Romāns Sladzis (bolss), Arnis Slobožaņins (gitarys, bolss). Īroksts taiseits Arņa Slobožaņina sātys studejā Daugovpilī, dzīsmi miksieja Armands Treilihs.