Latgalīšu izceļsmis kinu klasiķa Teuvo Tulio kinys niu byus nūsaveramys ari Rēzeknē

Latgalīšu izceļsmis kinu klasiķa Teuvo Tulio kinys niu byus nūsaveramys ari Rēzeknē
6. augustā 18:00 Rēzeknis piļsātys dūmis zalā, Atbreivuošonys alejā 93 byus izcyluo Suomejis kinu režisora Teuvo Tulio kinu kolekcejis i jam veļteitu gruomotu duovynuojuma svineiga nūdūšona Rēzeknis Centralajai bibliotekai. Duovynuojumu padūs Latvejis Nacionaluos bibliotekys (LNB) Atbolsta bīdreibys vaļdis puorstuovs. Ar itū pasuokumu nūsaslēgs latgalīšu izceļsmis suomu kinu režisora Teuvo Tulio (eistajā vuordā Teodora Antoneja Tugaja, 23.08.1912.–  08.06.2000.) 100. godskuortai veļteituo pīminis dīna.

Pasuokumā pīsadaleis gon Rēzeknis Centraluos bibliotekys, gon Rēzeknis dūmis, gon Latvejis Nacionaluos bibliotekys Atbolsta bīdreibys puorstuovi. Taipat gaideits kotrs interesents. Pasuokuma beiguos tiks ruodeita Tulio kina „Mīlesteibys krystā”.

Ar LNB Atbolsta bīdreibys storpnīceibu zīduotuos 12 Tulio kinys iz prīšku kotrs grybātuojs varēs nūsavērt Rēzeknis Centralajā bibliotekā. Pasasokūt zīduotuojim, itaidu kinu kolekceji ir sajiems ari Reigys Kinu muzejs i Latvejis Nacionaluo biblioteka.

Suomu storptautiski zynomuokais kinu režisors Aki Kaurismeki sovulaik Tulio nūsaucs par suomu režisoru Nr. 1. Bierneibu Teuvo pavadiejs Latvejā, slavi jis dabuoja cytur, kab piečuok krystu nažielesteibā, nu tyktu pīmināts vēļ šudiņ. Eistajā vuordā Teodors Antonejs Tugajs piec dzeivis Latvejā jau agri puorsaciele iz Suomeju, kur dabuoja atzineibu kai māmuo kinu akters i tyka saukts par „suomu Valentino” (piec analogejis ar Holivudys māmū kinu zvaigzni Rūdolfu Valentino). Pīsavieršūt režejai, Tulio radeja izteiktys melodramys – skaistys sīvītis tymuos meiļuoja, cīte i ļuovuos liktiņa nažieleigajim trīcīnim alkohola i veirīšu – pavadynuotju paskotā. Tulio dorbi (1930tī – 1970tī) teik vārtāti dīzgon pretruneigi – jam pīdievej gon klišeju atrožuošonu, gon pots saukts par protofeministu, gon suomu i pasauļa kinu duorgumu, jo jam veļteituos kinu retrospektivys teik izruodeitys vysā pasaulī.

Kinu režisora Teuvo Tulio 100. godadīnai veļteitī pasuokumi 6. augustā:

12:00 Pīminis kūka stateišona Kulturys darbinīkim veļteitajā parkā Stielnīku īlā 1c, Rēzeknē, sasatikšona ar keramiki Leonardu Vinceviču;
13:00 Braucīņs pa Teuvo Tulio pīminis vītom: dzymtuos sātys pīminis akmiņs i krysts Ilziskolna pogostā, Sološnīku kopi, kur guļa Teodora vacvacuoki, Nautrānu vydsškolys muzeja ustobys apsavieršona;
16:00 Pīminis mišs Nautrānu Ruomys katuoļu bazneicā Rogovkā;
18:00 Teuvo Tulio kinu kolekcejis i jam veļteitū gruomotu duovynuojuma svineiga nūdūšona Rēzeknis Centralajai bibliotekai, kinys ruodeišona.

Informaceju sagataveja Sanita Kitajeva

Karteņā – Teuvo Tulio gruomotys, publicitatis materiali

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]