Dežavu latgalīšu gaumē aba atsavieršona iz 3. pasauļa latgalīšu saīta atkluošonys pasuokumu

Dežavu latgalīšu gaumē aba atsavieršona iz 3. pasauļa latgalīšu saīta atkluošonys pasuokumu

Rēzekne, 1992. gods, 11.-13.augusts…kaisleibys, vīdūkli, tveice. 2002. gods, 11.-13. augusts, Rēzekne…tveice, diskusejis, kaisleibys. I niule 2012. gods, 3. augusts, tikšonuos vīta tei pat – Rēzekne. Otkon suteigi, svīdri teik aumalem i teik atkluots 3. pasauļa latgalīšu saīts. Nu molu molom – gon Latvejis, gon uorzemem (Sibira) – ir sasapulciejuši cylvāki, kam tyva ir Latgola. Latgalīši, kam ryup Latgolys nuokūtne, atteisteiba, atpazeistameiba.

Saīts aizasuocs ar sirsneigu pasuokumu Latgolys Kulturviesturis muzejā Rēzeknē, kur „Dzigys” ļusteigūs dzīšmu pavadeibā teik atkluotys iztuodis: „Pasauļa latgalīšu muoksla nu Latgolys Kulturviesturis muzeja kruojuma” i „Latgolys dvēselis tulkam Mikeļam Bukšam –100”, kai ari gruomotys atkuortuota izdavuma „Latgaļu atmūda” atvieršonys svātki.

Izstuodi „Latgolys dvēselis tulkam Mikeļam Bukšam – 100” taiseja treis sadarbeibys partneri: Rēzeknes Kultūrviesturis muzejs, Latvejis Nacionaluo biblioteka i Bolvu Centrāluo biblioteka, kas šūreiz īzajute ituo projekta vadeituojis lūmā. Projektu atbalsteja Vaļsts Kulturkapitala fonda Latgolys kulturys programma.

5. oktobrī izstuode pīdzeivuos sovus atkluošonys svātkus Reigā, šuo goda nūgalē prīcēs Bolvu īdzeivuotuojus i piļsātys gostus i tuoļuok sovu celi turpynuos iz Vileks, Baltinovys i cytim nūvodim.

Īsokam napalaist garom īspieju i apsavērt izstuodi, jo tei tik teišam ir izadavuse cīši skaista i tik dzeiveiga, ka napamat sajiuta, ka jimā dzeivoj ari poša Mikeļa Bukša gors i dvēsele.

Lobuok vīnu reizi redzēt, nakai 10 reizes dzierdēt, par tū īskotam ari dažys fotografejis.

Sarmeite Vorza
Bolvu Centraluo biblioteka

Karteņuos – izstuodis „Latgolys dvēselis tulkam Mikeļam Bukšam – 100” atkluošona, foto Inese Supe, Bolvu nūvoda muzejs

Print Friendly, PDF & Email

Komentari