„Jaunais Vōrds” sprīž par pīdareibu kuo naviņ pi kaidys tauteibys piec uzvuorda. (Avīžu ziņa.) Es, jis un Cierpiņu Blauzga uz „Jauna Vōrda” īrūsynojuma nūdybynojam atsevišku komiseju latgalīšu teirasineibys puorbaudeišonai. Lai sev baļtīši kengojās un atzeist par latvīšim, jo jim pateik taidu: Meirovicu, Ulmani, Šlosbergu, Skujovicu un cytus tam leidzeigus. Mes latgalīši bez puorbaudeišonys ni vīnam napīškiersim tīseibu sauktīs par latgalīti.

Bez smīklu. Kindzuļs vairuok guodoj par sovu buļļu teirašneibu, kai mes par sovim sabīdriskim darbinīkim. Seviški tī sasūdeitī Kristeigī nagrīz iz tū nikaidys viereibys. Jem, pīmāram, un pazeimoj par Rēzeknis posta prīkšnīku Sosnovsku, kas par tū, ka jis sauc sevi par latgalīti, un ka kaidu 10 godu sastuov Kristeigu partijā, bet jis ir pūļs. Redz jis Viļakā byudams div reizis beja aizguojis pi dekana Franckeviča, bet pi dekana Franckeviča ir taida radinīca, kura syuta sovus bārnus muoteitīs iz Pūleju. Redzit, skaidra līta, ka Sosnovskis ir pūļs. Pa klusiņom pat runojūt nu juo i pūļu smoka īt, Blauzga jau ūsteja īdams pakaļ jam iz postu.

Lai nuokūtnē taidi gadejumi naatsakuortuotu, mes uzaicynojam vysys latgalīšu partejis sovus kandidatus aiz kaidim sabīdriskim omotim padūt myusu styngrai ekspertizai. Piec puorbaudis, teirašneigus latgalīšu, mes apzeimēsim, īdadzynojūt tim kreisā ausī burts „L. T.”(Latgolys Teirašneigais) un tūreiz taidi Kundzeni kai Šadurskis, Bondarevskis, Baranovskis, Volont, Korsak un cyti tam leidzeigi natiks vairs omotā un Latgolys intelegence byus gluobta.

S-ans

Olūts –  Latgolys Words. – Rēzekne, 1932. g. 21. septembrī. – Nr. 38. – 3. pl.