Oktobra suokuos Medņevys Tautys nomā tyka svieteits Medņevys etnografiskuo ansambļa 25 godu jubilejs.

Medņevys etnografiskais ansamblis par sovu dzimšonys dīnu izskota 1987. goda 11. apreli, kod beja pyrmuo dzīduotuoju uzastuošona Bolvu rajona cīmu saceņseibuos. Ansamblim ir nūzeimeiga vīta pogosta kulturys dzeivē vysūs laikūs. Tī ir ļauds, kuru dūmys jem vārā. Sīvom ir breineiga humora izjiuta, juos spiej sasmīdynuot da osoru, nu spiej ari aizkustynuot ari liriskom skumom dzīsmem, kai ari nūsorkt ar truopeigom apsadzīduošonys ailem.

Sovu pateiceibu i atzineibu par ansambļa dorbu izsaceja Kulturizgleiteibys i namaterialuo montuojuma centrs. Taipat ansambļa sveicieju pulkā beja etnomuzikologe Anda Beitāne, ar kuru Medņevys dzīduotuojom itūs godu laikā izaveiduojuse vysu cīšuokuo sadarbeiba. Pasasokūt Andai, 2008. goda oktobrī izguojuse gruomota „Medņevas dziedātājas” par Medņevys etnografiskū ansambli, tuo dzīduotuojom i ari boguoteigu dzīšmu i audio materialu.

Medņevys etnografiskais ansamblis ir festivala „Baltica” dalinīks i itymā godā, pyrmū reizi festivalā pīsavieršūt ari saļmu dzīduošonys tradicejai, Medņevys sīvom beja tys gūds paruodeit saļmu dzīduošonys tradicejis Zīmeļlatgolys pusē. Interesna puslopa ansambļa radūšajā viesturē ir sadarbeiba ar tautys deju ansambli „Liesma”, kas aizasuoce 1993. godā. Sovulaik deju ansambļa vadeituojs Juoņs Marcinkevičs beja Medņevys cīma kluba vadeituojs, nu itūs godu laikā ansambļu sadarbeibā topuši izvadumi gon Mežaparka Lelajai estradei – dzīšmu svātku nūslāguma koncertam, gon LTV1 programai taiseits izvadums „Ols lobs, gosti lobi”.

Lelu pateiceibu ansamblis izsoka ari ilggadeigai Bolvu rajona Kulturys nūdalis vadeituojai Rutai Cibulei, kas atbalstejuse i paleidziejuse Medņevys etnografiskajam ansamblim ar „izīšonu tautuos”.
Medņevys etnografiskū ansambli jubilejā sveice gon ar dzīsmem, gon dzigom i teatra izvadumim. Sveicieju pulkā beja i rodi, i draugi, i sābri – Viduču pamatškola, vokalais ansamblis „Melodija”, folklorys kūpa „Egle”, Vileks etnografiskais ansamblis „Abrenīte”, Medņevys pogosta pyrma školys izgleiteibys īstuode „Pasaciņa”, Kupravys etnografiskais ansamblis, Medņevys pogosta invalidu kluvs, Škilbanu etnografiskais ansamblis i Medņevys dramatiskais kolektivs.

Vaira par Medņevys etnografiskū ansambli vari puorskaiteit Bolvu regiona kulturviesturis datu bazē.

Informacejis olūts i kartenis nu Vileks nūvoda sātys lopys