Naujenis Kulturys centrā 6. februarī nūtyka pyrmuo latgalīšu kūpys tikšonuos „Sirdī asu latgalīts!”, kura pīruodeja, ka naujenīši ir gotovi apsavīnuot i kūpā izzynuot, apkūpuot i daleitīs sovā pīredzē par latgalīšu tradicejom, paražom i kulturu. Nivīns nu pasuokuma organizatorim i dalinīkim nabeja ceriejs sagaideit tik kuplu interesentu skaitu.

Latgaliskuos vierteibys – latgalīšu volūda, saglobuotuos tradicejis, latgalīšu vīsmīleiba i eistyna svātku svieteišona – par tū vysu tyka runuots i diskutāts. Latgalīšu kūpys idejiskuo īdvasmuotuoja Anna Botere spiere pyrmū sūli ceļā iz kūpys dybynuošonu. Pyrmajā tikšonuos reizē jei izkluosteja sovys rodūšuos idejis i planus par kūpys aktivū darbeibu, kai ari rūsynuoja vysus dalinīkus izvērst diskusejā jaunys i rodūšys idejis. Par kūpys golvonū mierki teik uzskateita pīredzis nūdūšona gon latgalīšim, gon cytu kulturu puorstuovim. Vaicuojums par kūpys nūsaukumu vēļ palīk atkluots.

Nuokušuo tikšonuos reize nūtiks 20. februarī Naujenis Kulturys centrā, deļtam vysi latgalīši teik gaideiti trešdīnēs iz jauku sadraudzeibys, pīredzis i vierteigu padūmu apmainis vokoru.

Vaicuojumu gadīnī var zvaniet ci raksteit Naujenis Kulturys centram: T. 65474268, naujene_kc@inbox.lv.

Karteņa: Latgalīšu kūpys tikšonuos „Sirdī asu latgalīts!”, dnd.lv
Ziņu sagataveja: LaKuGa