Svātdiņ nūtyka trešais šova „Koru kari 3” ituos sezonys laidīņs, i ceļu iz šova finalu turpynoj ari Rēzeknis zaļūs pakolnu kors. Cikom koram ar šova žureju naīt vīgli, nu ar dzīduošonys prīcu, ļusteigū pruotu i atbaļsteituoju podturiešonu, daleiba kasnedelis laidīņūs teik turpynuota.  

Šova pyrmajā nedeļā kors sevi dasaceja ar Normunda Zuša dzīsmi „Paleidzi, Dīvs”, kura dabuoja Latgalīšu kulturys Goda bolvu „Boņuks 2012” nominacejā „Radejis hits” kai spālātuokuo latgaliskuo dzīsme Latvejis radeju stacejuos 2012. godā.

LaKuGa vaicuoja kora vadeituojam Normundam, voi šova laikā vēļ kaidu reizi izskanēs dzīsmis latgaliski, i atsakluoja, ka gadejumā, ka kors tiks tik tuoli, tod 5. raidejumā izskanēs kaida latgalīšu tautysdzīsme i vysu lobuokajā gadejumā – latgaliski kors dzīduos ari šova finalā.

Kora dalinīki ir aktivi jaunīši i ļauds nu vysys Latgolys, nu kora vadeiba uzticāta grupys „Galaktika” solistam Normundam Zušam. Daudzi nu kora dalinīkim gūdam puorstuoviejuši i nasuši piļsātys, nūvoda i vysys Latgolys vuordu ari cytūs TV šovūs i raidejumūs. Zaļūs pokolnu kuorī apsavīnuojuši 16 dzīduotuoji nu Rēzeknis i tuos apleicīnis – Zaiga Pavlovska (nu dzīdūšuos Pavlovsku saimis), Ingars i Arturs Punculi (šova “Dzīdūšuos saimis” uzvarātuoji), Aija Eriņa (nu dzīdūšuos Eriņu saimis i konkursa “Latvejis talants” uzvarātuoja), Inga Mazure (duets “Inga i Normunds”), Gints Ločmelis (nu grupys “Ginc&Es”), Baiba Reine (ituo goda Eirovizejis dzīšmu konkursa pusfinaliste), Mārtiņš Strods, Lauris Komuls, Normunds Litovnieks, Leila Rasima, Linda Mežore, Ingrīda Balode, Antra Skutele, Muorteņš Drulis i Rolands Keišs.

Ka Rēzeknis Zaļūs pakolnu kuors dabuos golvonū bolvu, jī tū zīduos Rēzeknis slimneicys dzemdeibu nūdaļai, prīšklaiceigi dzymušūs bārnu saglobuošonys aparata „inkubatora” pierkšonai.

Kora aktivitatem leidza var sekuot ari draugiem.lv, facebook.com i twitter.

Rēzeknis zaļūs pakolnu kors – „Paleidzi, Dīvs”

Latgolys Regionaluos televizejis sižets par Rēzeknis zaļūs pakolnu kori

Šova 1. dīnysgruomota – Rēzeknis kors

Šova 2. dīnysgruomota – Rēzeknis kors

Kartenis: kora privatais arhivs i nu portalim kasjauns.lv i delfi.lv
Ziņu sagataveja: LaKuGa