Skateituoju mīlesteibu sajāmušū Latvejis Nacionaluo teatra izruodi „Latgola.lv” byus īspieja redzēt Modūnys estradī 7. junī 20 stuņdēs. Itei byus pyrmuo reize, kod „Latgola.lv” tiks spālāta breivdobys estradē.

Danskovītis „Latgola.lv” Valda Lūreņa režejā ir absoluta pādejūs godu rekordiste, tei nūspālāta jau vairuok nakai 100 reižu. Myusu dīnu dzeivis dreizajā tempā i dažaidu pīduovuojumu puorpiļneibā 100 nūspālātu izruožu ir rekordlels skaits. Latgalīšu vitalitate, koloritī tipaži, komiskys sadzeivis situacejis, mīlesteibys peripetejis par speiti pensejis godim – tys vyss saista skateituoju.

Lūmuos: Uldis Dumpis, Dace Bonāte, Anna Klēvere, Daiga Gaismiņa, Daiga Kažociņa, Indra Burkovska, Voldemārs Šoriņš, Līga Liepiņa, Gunta Virkava, Gundars Grasbergs, Valdis Zilveris i Mārtiņš Egliens.

Biļetus var nūpierkt k/t „Vidzeme”, īprīkšpuordūšonā 3 Ls, pasuokuma dīnā 5 Ls.

Karteņa: Latvejis Nacionaluo teatra publicitatis materials
Ziņu sagataveja: LaKuGa piec Latvejis Nacionaluo teatra materialim