Nu 14. leidz 30. novembram Pelieču kulturys nomā Preiļu Viesturis i lītiškuos muokslys muzejs pīduovoj izstuodi „Zem Latgales drošā spārna”, kas veļteita žurnalistam, dzejnīkam i muokslinīkam Ontonam Rancānam (1933–2009).

Izstuodē byus apsaverami akvareli, reprodukcejis nu Ontona Rancāna 1952. goda skiču albuma taidā veidā, kai albumu beja īkuortuojs pats autors, kai ari tyva Rancāna drauga i dūmubīdra Pītera Gleizdāna (1934–2013) draudzeigī šarži.

Ontons Rancāns dzims 1933. goda 19. augustā Nautrānu pogosta Kārānūs. Juo bierneiba paguojuse Ičys upis krostūs, tys nūsacejs pseidonima izvieli i sovā ziņā ari pasauļa izjiutu. Absolviejs Nautrānu vydsškolu i LVU Filologejis fakultati. Kai žurnalists struoduojs Kuorsovā, Ludzā, Preiļūs. Ontons Rancāns ir darejs ari organizatoriskū i redaktora dorbu presis izdūšonā – Latgolys lauku kulturys kompleksa „Jōsmuiža” izdevnīceiba juo vadeibā ir izdavuse vairuok nakai desmit gruomotys, bet nu 1995. goda ari Latgolys nūvoda laikrokstu „Zemturis”, kas piec Rēzeknis Latgalīšu kulturys bīdreibys i veiskupa Juoņa Buļa īrūsmis beja bāze Rēzeknis-Aglyunys diecezis izdavumam „Gaismas Taka”, kur Ontons beja i žurnalists, i saliciejs-maketātuojs, i redaktors.

Sovys emocejis Ontons Rancāns paude ari dzejā, kū jis paraksteja kai Oņte Leičujōņs. Dzejūli tykušs publicāti vairuoku rajonu laikrokstu slejuos.
Ontons Rancāns mirs 2009. godā, apglobuots Preiļu kopsātā.

Ziņu sagataveja: LaKuGa piec izstuodis organizatoru informacejis
Karteņa: O. Rancāns preili.lv