Latgolys kulturviesturis muzejs atdarynuojs Latgolā austuos jūstys
Latgolys regiona atteisteibys agenturys finanseituos „Latgolys kulturys programys” ītvorūs Latgolys kulturviesturis muzejs ir realiziejs projektu „Latgales tekstiliju kolekcijas saglabāšana. Latgales jostu atdarināšana”.
Muzejā globuotajā tekstileju kolekcejā ir gondreiž 1000 prīkšmati, tymā skaitā ari kruošņuos Latgolys jūstys, kas apvīnoj vysaidys tūs darynuošonys tehnikys, kruosu salykumus i pīlītuošonys pajiemīnus, iz kū šudiņ vārsta tūs viesturnīku, meistaru i interesentu viereiba, kas pietej Latgolys tautys tārpu kai nacionalū kulturys zeimulu, deļtam cīši svareiga ir tūs saglobuošona šudiņ i pīejameiba sabīdreibai. Muzejs realizej sova kruojuma pīejameibu i īkļaušonu Nacionalajā muzeju kruojuma kūpkatalogā (www.nmkk.lv).
Projekta ītvorūs, realizejūt muzeja miseju, tyka atdarynuotys Latgolys kulturviesturis muzeja kruojuma 20. gs. suokumā i 30. godūs austuos i lītuotuos 13 etnografiskuos jūstys, kas ir Latgolys regiona kulturviesturis atspūguļuojums. Jūstom ir lītuošonys laikā atstuotys pādys, leidz ar tū tuos ir trauslys. Atdarynuošonys dorbus veice Tautys lītiškuos muokslys studejis „Dzīpariņš” dalineicys, kurys dorbu nūslāgumā muzejā reikuotajā seminarā daliejuos ar stuostiejumu par jūstu ausšonys tehnikom i projekta ītvorūs padareitū dorbu.
Turpynojūt sadarbeibu ar TLMS „Dzīpariņš”, aicynojam vysus interesentus Latgolys kulturviesturis muzejā, 2014. goda 5. aprelī pīsadaleit rodūšū darbneicu aktivitatēs, kas reikuotos namaterialuos kulturys montuojuma akcejis „Sateic sovu meistaru” ītvorūs.
Ziņu sagataveja: LaKuGa piec Latgolys kulturviesturis muzeja snīgtuos informacejis
Karteņa: Latgolys kulturviesturis muzeja arhivs