Lai uzturietu diskuseju par Latviejis kulturys montuojumu i muokslys vierteibom, nacionalū identitati i sabīdreibys kolektivū atmiņu, školu jaunīšim jau ūtrū godu teik reikuots konkurss par Latvejis kulturys kanonu. Pyrmajā konkursa kuortā kotrā regionā tyka nūskaidruotys divejis lobuokuos komandys, kas konkursu turpynuos ūtrajā kuortā Reigā. Nu Latgolys tuos ir Rēzeknis Vaļsts pūļu gimnazeja i Ruguoju nūvoda vydsškola.

Komandu aizdavums ir pīduovuot treis jaunys vierteibys, kurys vajadzātu īkļaut Latvejis Kulturys kanonā. Niu sovu redzīni par komandu izvālātajom vierteibom ar socialuo teikla facebook paleidzeibu var izsaceit sevkurs.

Rēzeknis Vaļsts pūļu gimnazeja pīduovoj taidys jaunuo kulturys kanona vierteibys:

Dramatiskais kolektivs “Palādas”
„Palādas” ir latgalīšu mentalitatis i teatra tradiceju nesiejs,
vīns nu vodūšajim amatīrteatrim Latvejā, kura originalizruode ir pamats pyrmajam īstudiejumam latgalīšu volūdā Latvejis Nacionalajā teatrī – “Latgola.lv”.
Dramatiskais kolektivs realistiski attāloj 21.gs. paaudžu mijīdarbeibu, kliustūt par spylgtu Latgolys laika zeimi.

Austrumlatvejis rodūšūs pakolpuojumu centrs “Zeimuļs”
“Zeimuļs” atkluoj Rēzeknis jaunīšu pīdereibu 21. gs. Latvejai, kurā sasavyn etniskais ar modernū, estetiskais ar funkcionalū.
Arhitektoniski drūsmeigs projekta rysynuojums, sasaistūt piļskolnu, kurymā atsarūn Livonejis laika piļsdrupys ar modernū arhitekturu.
Originala arhitektura, kas simbolizej laikmeteiguos kulturys aizsuokumus Rēzeknē.

Muokslys kina “Cylvāka bārns”
“Cylvāka bārns” ir pyrmuo Latvejis kina, kas nomineita Oskara bolvai.
Paruoda latvīša mentalitatis pozitivū aspektu.
Pyrmuo muokslys kina latgalīšu volūdā.
Boņuks atspūguļoj svareiguokuos etiskuos vierteibys.

Ruguoju vydsškola pīduovoj taidys jaunuo kulturys kanona vierteibys:

“Prāta Vētra”

“Prāta Vētrai” ir juobyut kulturys kanonā, partū ka itei grupa ir ploši zynoma na tik Latvejā, bet ari uorpus tuos rūbežom. Jūs muzyka simbolizej Latvejis identitati, mentalitati i sasylda klauseituoju sirds.

Maijis Tabakys “Regīna”

Maijis Tabakys dorbu ciklam “Regīna” ir juobyut Jaunajā Kulturys kanonā, partū ka itī izcilī šedevri simbolizej Latvejis muokslu kai kūšu, izsmolcynuotu i dvēselisku goru, kas meit kotrā latvītī.

Latgolys viestnīceiba GORS

GORS ir pats pyrmais Latvejā nu pamatim izcaltais koncertzals. Īspaideigs, skaists, ar breineigu akustiku. Tys ir miļzeigs sūļs kulturys atteisteibai Latvejā, kuram nūteikti juoteik kulturys kanonā.

Konkursa finals nūtiks 7. februarī Zyrgu postā, Reigā. Leidz tam komandu pīduovuojumus var nūviertēt socialajā teiklā  facebook, komentejūt sovys favoritkomandys plakatu, kai ari nūmīdzūt like i share.