1. junī 20.00 Rēzeknis Festivala parkā, Muokslys i muzykys festivala “SevenHills” ītvorūs, uzastuos vairuokys Latgolys grupys – “Kapļi”, “Aftoportret”, “Dabasu Durovys”, “Green Novice”, “Bez PVN” i Sovvaļnīks. Na tik skateituoji, nu ari muziki ar lelu napacīteibu gaida festivala koncertus Rēzeknē.

Grupys “Kapļi” (Drycāni/Buozova) dalinīks Oskars Orlovs atzeist: “Projektam “Kapļi” tik lelā pasuokumā byus juospielej pyrmū reizi, partū gaidam tū ar napacīteibu i cīši atbolstom, ka itaids festivals nūteik Rēzeknē. Gaidam lobu uzastuošonu, sajiutys, elegantys vibracejis. Klauseituoji var gaideit kaidu jaunu performanci nu “Kapļu”, i nūvielej skateituojim spāku, partū ka “Kapļi” byus!”

Ari grupai “Dabasu Durovys” (Daugovpiļs) itys festivals ir cīši nūzeimeigs. Grupys gitarists i solists Arņs Slobožaņins atkluoj: “Rēzeknē vaira kai pyrms 8 godu nūtyka pyrmais “Dabasu Durovu” koncerts, partū itei piļsāta vysod byus eipaša myusu grupai. Festivala ideja i koncepceja ir laikmeteiga, aktuala, partū vēļ vaira ir pateikami i gūds ite spielēt.”

Latgolys rokgrupys atzeist, ka, spielejūt vysaidu festivalu koncertūs, vysvaira pateik sasatikšona ar skateituoju. Latgalīšu dzīsminīks Sovvaļnīks (Rēzekne) uzsver: “Ir pateikamai, ka koncertūs saguojušuo publika, kas nūviertej tū, kū mes dorom iz skotuvis. Pošim tei byus pyrmuo uzastuošona itymā godā piec ilga klusuma i gondreiž goda puortraukuma, leidz ar tū klauseituoji var cerēt iz puors jaunom dzīsmem.” Sovukuort grupys “Bez PVN” (Latgola) dalinīks Guntis Rasims pībylst: “Spielēt iz skotuvis breivā dobā vysod ir eipaša burveiba – svaigs gaiss, vaira vītys cylvākim i skaļuoka muzyka.”

Gaidūt Latgolys grupu koncertu, grupys “Dabasu Durovys” līders Arņs Slobožaņins klauseituojim nūvielej: “Meiļuojit muzyku, klausitēs tū na tik ar ausim, bet ari ar dvēseli!”

Beletus iz koncertu var īsaguoduot www.bilesuparadize.lv (moksa 3,00 EUR)

Informaceju sagataveja:
Sandra Dervinika,
Daugovpiļs Universitatis studeju programys “Starpkultūru attiecības” studente