UNESCO Latvejis Nacionaluo komiseja (LNK) sadarbeibā ar partnerim Latvejā, Lītovā i Igaunejā apkūpuos īdzeivuotuoju atminis par Baļtejis ceļa laiku i daleibu tymā. Sagaidūt Baļtejis ceļa 25. godadīnu, projekta “Baltijas ceļa stāsti” ītvorūs ituos atminis tiks apkūpuotys škārsteikla platformā www.thebalticway.eu, kai ari īkļautys Latvejis Nacionaluo viesturis muzeja kruojumūs, bet 25 no tim – izdūti eipašā publikacejā.

Leidz pat ituo gods beigom sevkurs aicynuots pastuosteit sovu Baļtejis ceļa stuostu, syutūt tū iz UNESCO LNK voi publicejūt www.thebalticway.eu. Kab stuostus piec tam vīgļuok apkūpuot, tūs autori teik aicynuoti izmontuot UNESCO LNK sātys lopā atrūnamū veidni. Taipat sovus stuostus var pastuosteit projekta viestnešim kaidā nu UNESCO LNK teiklu organizacejom vysā Latvejā – muzejim, školom voi bibliotekom, kas paleidzēs tūs pīraksteit i īsnīgt. Latgolā taida vareiba ir Daugovpiļs 20. pyrmsškolys izgleiteibys īstuodē, Daugovpiļs Vaļsts gimnazejā, Daugovpiļs Vīneibys pamatškolā, Jaunsylovys pamatškolā, Rībeņu vydsškolā, Preiļu Golvonajā bibliotekā i Rēzeknis piļsātys Centralajā bibliotekā.

Itūgod byus 25 godi nu dīnys, kod pasaulī izskanieja informaceja par 1989. goda 23. augustā organizietū Baļtejis ceļu – unikalu i mīreigu masu demonstraceju, kurys laikā vaira nakai miļjons cylvāku sasadeve rūkuos, kab veiduotu 600 km garu cylvāku kēdi caur trejom Baļtejis vaļstim, vīnojūt Igauneju, Latveju i Lītovu centīņūs piec breiveibys.

Baļtejis ceļa dokumentarū montuojumu veidoj vierteigs dokumentu arhivs. Nūzeimeiguokūs dokumentus, kas tyka apkūpuoti Baļtejis vaļstu kūpeigā nominacejā, 2009. goda 30. julī īkļuove UNESCO starptautiskajā registrā “Pasaules atmiņa”.