9. augustā nu 10.00 reitā lidlaukā “Rēzekne”, Audriņu pogostā, vysus interesentus aicynoj vēļ nabejs pasuokums — Rēzeknis nūvoda Aviacejis dīna, kurā sevkuram byus vareiba īsavērt romantiskajā aviacejis pasaulī, vāruot pilotu paraugdemonstriejumus i paraplanu liduojumus. Drūsmeiguokī varēs pasaceļt augstu gaisā, kab pasavārtu, cik skaista ir Latgola nu putyna liduojuma. Pasuokumā byus apsaveramys ari Vaļsts Rūbežsardzis koledžys i Zemissardzis tematiskuos izstuodis.

Aviacejis svātkūs varēs apsavērt vairuokus desmitus i privatūs lidaparatus, i rūbežsardzis i NBS Gaisa spāku reiceibā asūšūs gaisa kuģus, ar kurim kasdīnā teik veiktys sarežgeitys i atbiļdeigys gluobšonys voi rūbežkontrolis operacejis. Vairuoku itaidu aeromobilūs operaceju paraugdemonstriejumus Aviacejis dīnā varēs redzēt ari kluotīnē, tamā storpā, Vaļsts rūbežsardzis Aviacejis puorvaļdis Aviacejis dīnasts kūpā ar Apsardzis i specialūs aizdavumu dīnastu “Sigma” demonstrēs vuiceibu aizdavumus “Guņs dziesšonys ar helikoptera guņs dziesšonys apreikuojumu”, “Cītušuo evakuiešona ar helikopteru, kurs apreikuots ar nastuvem” i “Puorkuopieju aizturiešona”. Svātku nūslāgumā byus vareiba vāruot, kai golvu reibynojūšus kiuliņus gaisā mess “Pitts Monster” piloti.

Aviacejis svātkus apmeklēs Īkšlītu ministrs Rihards Kozlovskis, Satiksmis ministrejis i Aizsardzeibys ministrejis puorstuovi, Vaļsts rūbežsardzis prīkšnīks generaļs Normunds Garbars, NBS Gaisa spāku aviacejis bāzis komanders pulkveds Aivars Mežors, Vaļsts rūbežsardzis koledžys direktors pulkveds Arvīds Līpeņš i cyti.

Vysārtuok Aviacejis dīnā var tikt ar personeigū transportu. Nu Rēzeknis nūvoda pogostu puorvaļdem tiks nūreikuoti ari pogostu autobusi (par atīšonys laikim interesētīs pogostu puorvaļdēs). Iz svātkim var dūtīs ari ar sabīdryskū autobusu Rēzekne – Mežuore (nu Rēzeknis Autoūstys autobuss izbrauc 14.20). Braucieju ierteibai 9. augustā itys maršruts ir pagarynuots leidz lidlaukam. Atpakaļ nu lidūstys ar autobusu var braukt 14.50 i 18.40.

Beleta cena: 2 EUR, saimis belets – 5 EUR. Školānim, studentim, pensionarim – 1 EUR. Bārnim leidz 7 godu vacumam, 1. i 2. grupys invalidim – īīšona breiva.

Programa:

10.00 -12.00 Lidmašynu apsavieršona

13.00 –14.30 Vyspuorejuos aviacejis lidmašynu demonstraceja
14.30 – 15.30 Rūbežsardzis reiceiba aeromobilajuos operacejuos

15.30 – 16.30 Paraplanu liduojuma demonstriejumi

16.30 – 17.00 Pitss Monster aerobatikys paraugdemonstriejumi

17.00 – 19.00 Panoramys liduojumi