Senejuo Kruoslova pīejama vysim

Senejuo Kruoslova pīejama vysim

12. septembrī, Reigys īlys svātkūs, Kruoslovys sirdī atkluoja kasgadejū fotopleneru “Kruoslova” i ostonis viesturiskys lelformata kartenis. Senejuos Kruoslovys pīejameiba vītejim i gostim ir foto kluba “Zibsnis” iniciativa.

Ideja īguoja pruotā kluba bīdrei Ingai Pudnikai: “Reitūs ībraucūt piļsātā ar sabīdriskū autobusu i radzūt tukšuos restis iz “Sapņa” ākys, nūdūmuoju – izcila vīta karteņom!”

Tūlaik pozitivu rezonansi sabīdreibā raiseja Kruoslovys nūvoda dūmis izdūtais kalenders ar senejuos Kruoslovys nu jau pagaisušajim skotim i cylvākim, partū kluba bīdri beja puorlīcynuoti – karteņom juobyut dokumentalom. “Mums pasaveice, ka ideja īdvasmuoja zemnīku saimisteibys “Sapnis” īpašnīkus, Rītumu Bankys lobdareibys fondu, Kruoslovys nūvoda dūmi i golvonais – sabīdreibu,” stuosta projekta vadeituoja Gunta Čižika, ”idejis realizacejā sovu dorbu i energeju īguļdeja daudzi cylvāki i organizacejis, asam jim pateiceigi par entuziasmu i atbolstu!” Kūpā dorbojūtīs panuokts taustams rezultats – piļsātys centrs ir dzeivuoks i latvyskuoks. Efekteigi kartenis izavērs naktī, partū ka nūvoda dūme apsajāmuse nūdrūšynuot karteņu apgaismuojumu.

Nu jau par tradiceju palykušais, leluokais sabīdreibai pīejamais foto pasuokums – fotopleners “Kruoslova”, turpynuojuos ari 13. i 14. septembrī. Tradicionali vīnu dīnu veļteja lekcejom i nūdarbeibom, ūtrajā – īpazeistynuoja ar Kruoslovys nūvodu vītejūs i gostu fotografus.

Reigys īlys dīnys Kruoslovā kolpuoja par īdvasmys olūtu itūgod pīsavērst piļsātvidei, arhitekturai, interjerim i kulturviesturei. 13. septembrī Kruoslovys kulturys nomā pleneristi tyka pi zynuošonu par piļsātvidis kartenis tipologeju Aivara Buļa vadeibā, īsadzilinuoja Kaspara Freimaņa atkluotajūs kadriešonys nūslāpumūs, aizrauteigi fotografēja Kulturys noma interjeru Anatola Kauškaļa meistarklasē i izstruoduoja sovu fotostuosta scenareju kūpā ar Reini Fjodorovu.

Vierteiga pastaiga pa Kruoslovu izavērte režisora Andreja Jakubovska vadeibā, dūmuos vizualizejūt scenareja meistara vuordu kartenis i teikūt pi īdvasmys individualim fotoprojektim.

Praktiskuo darbeiba turpynuojuos 14. septembra reitausmā, īpazeistūt eipašu vītu Latvejis suokumā – Indru. Fotografi īmyužynuoja pasamūdušu brīdi, austūšū sauli, viļcīņu mūdynuotu cīmatu i devēs iz Indrys ausšonys darbneicu “Indrys Pyuraluode”.

Indrys audiejis i kulturys darbineicys fotografus sagaideja ar kiupūšu kopeju i īpazeistynuoja ar cīma viesturi i omota nūslāpumim. “Kod nakod ir tik svieteigai izīt uorpus sev īrostuos kasdīnys dzeivis. Aizbraukt iz cīmu, kas atsarūn Latvejis suokumā, kab satyktu Cylvāku. Cylvāku, kas aizraun, īdvasmoj i līk prīcuotīs par tū, ka mums kluotyn dzeivoj tik stypri, tik dzeiveigi, tik rodūši, tik apbreinuojami Cylvāki. Ar osu pruotu. I vīdu sirdi. Radzūši i dareit grybūši,” sovys emocejis piec tikšonuos ar audieju Reginu pauž Valija Platace, i itei atkluosme mūdynoj ari “Zibšņa” gondarejumu par padareitū, partū ka ari foto kluba veikuma pamatā ir cylvāki, idejis i dorbs.

Plenera nūslāgumā, mīlojūtīs ar korstim blīnim i svaigi vuoreitu īvuorejumu, kluba bīdri i draugi atzeimuoja “Zibšņa” pīktū dzimšonys dīnu ar prīcu secynojūt, ka kūpeiga dorbuošonuos ir dzeivuotspiejeiga, pošim i sabīdreibai vajadzeiga.

Eipašs paļdis par sadarbeibu pasuokumu eistynuošonā Inesei Urbānei, Larisai Bārtulei, Juoņam Geibam, Arkādijam Petaško, Anatolam Kauškalim, Valdai Timulei, Anželai Kuzminskai, Inārai Dzalbei i Vilim Stivriņam.

Kalenders

May
24
Sai
12:00 Saimu folkfestivala “Taka” dīnys... @ "Jaunā Teika"
Saimu folkfestivala “Taka” dīnys... @ "Jaunā Teika"
May 24 @ 12:00 – 18:45
Pīsadola: “Garatakas” jaunīšu kapela, folklorys kūpa “Ceiruleits”, folklorys kūpa “Tarkšķi”, Juoņa Ivanova Rēzeknis muzykys vydsškola, folklorys kūpa “Rūžupis veiri”, muzykaluo apvīneiba “Trio Bille”, folklorys kūpa “Skandinieki”, vokalais trio “Kalme”, folklorys kūpa ”Garataka”, Melkutus Party (FIN),[...]
16:00 Mada svātki @ pi Jersikys pamatškolys
Mada svātki @ pi Jersikys pamatškolys
May 24 @ 16:00 – 23:45
Mada svātki @ pi Jersikys pamatškolys
19:00 Saimu folkfestivala “Taka” lelko... @ "Jaunā Teika"
Saimu folkfestivala “Taka” lelko... @ "Jaunā Teika"
May 24 @ 19:00 – 21:00
Koncertā pīsadaleis: folklorys kūpa “Ceiruleits”, MIKC Latgolys muzykys i muokslys vydsškolys audziekni, folklorys kūpys “Tarkšķi” bārni, folklorys kūpys “Tarkšķi” jaunīši, folklorys kūpa “Skandinieki”, muzykaluo apvīneiba “Trio Bille”, muzykalais trio “Kalme”, folklorys kūpa “Garataka”, Melkutus Party[...]