4. novembrī Reigā kinoteatrī “Splendid Palace” pyrmizruodi pīdzeivuos režisora Normunda Punča dokumentaluos spielkinys žanrā veiduotā kina “Segvārds Vientulis“. Kina viestej par Vonogu draudzis katuoļu prīstera Ontona Juhņeviča tragiskuo dzeivis stuosta beigu pūsmu, kas nūsarysynuoja Latvejai i Latgolai viesturiski dramatiskūs apstuokļūs.

Kinys centrā ir prīstera Ontona Juhņeviča īkšejais konflikts storp gareidznīka morāli ētiskajim uzstuodejumim i patriotisma jiutom, kas līk jimt rūkā īrūci, lai aizstuovātu Tāvzemi i Bazneicu laikā, kod Latgolā atsagrīž padūmu okupacejis režims.
Vonogūs Ontona Juhņeviča vuords nu cylvāku atmiņom nav pagaiss – par tū līcynoj pīminis plāksne pi Vonogu bazneicys sīnys, nūruode iz tū Vonogu centrā, ekspoziceja Vonogu pamatškolys muzejā, pīmineklis Augšmuktūs Latvejis breiveibys idejis aizstuovim piec Ūtruo pasauļa kara – Latvejis Tāvzemis sorgu (partizanu) apvīneibys izveiduotuojim, vadeituojim i īdvasmuotuojim.

Kinys scenarejs tops sadarbeibā ar viesturnīkim Juoni Viļumu, Inesi Dreimani i Ritvaru Jansonu. Kinā tāloj profesionali aktīri – Vairis Piņķis, Vilis Daudziņš, Ieva Aniņa i cyti. Kinā dzierdama ari latgalīšu volūda.

Kinai izveidota ari lopa facebook.com/segvardsvientulis.